Ashok Kharat : काल CM फडणवीसांची घोषणा, आज खरातच्या मागे लगेच लागली ED ; मनी लाँड्रिंगचा गुन्हा दाखल..

Ashok Kharat ED action : शेकडो महिलांवर लैगिंक अत्याचार व फसवणूक करणाऱ्या भोंदू अशोक खरातच्या अडचणीत आणखी वाढ झाली आहे. खरातवर आधीच १२ गुन्हे दाखल आहेत. एसआयटीकडून याप्रकरणाचा तपास सुरु आहे. असे असताना आता अंमलबजावणी संचालनालयाने (ED) ने या प्रकणात उडी घेतली आहे. खरातविरोधात मनी लाँड्रिंगचा गुन्हा दाखल करण्यात आला आहे.

मुख्यमंत्री देवेंद्र फडणवीस यांनी रविवारी नाशिकमध्ये बोलताना भोंदू अशोक खरात प्रकरणाची सखोल चौकशी केली जाणार असल्याचं सांगितलं होतं. खरातच्या बेहिशेबी मालमत्तेची चौकशी सक्तवसुली संचालनालय (ईडी) करणार असून, प्राथमिक तपास सुरु केल्याची माहिती फडणवीस यांनी दिली होती. त्यानंतर लगेचच सोमवारी खरातवर ईडीने थेट मनी लाँड्रिंगचा गुन्हा दाखल केला आहे.

खरात प्रकरण आता थेट ईडीने हातात घेतल्याने खरातसह अनेकांचे धाबे दणाणले आहेत. पोलिसांनी जमा केलेली सर्व महत्त्वाची कागदपत्रे ईडीने आपल्या ताब्यात घेतली आहे. अशोक खरातवर केवळ अत्याचाराचेच नाही, तर फसवणूक करून कोट्यवधी रुपयांची मालमत्ता जमवल्याचे गंभीर आरोप असून ईडी आता या आर्थिक गैरव्यवहाराच्या मुळाशी जाणार आहे.

एसआयटीकडून आधीच याप्रकरणाचा सखोल तपास सुरु आहे. त्यात आता ईडीनेही एण्ट्री घेतली आहे. खरात मुंबईतून हवाला रॅकेट चालवत होता असा संशय व्यक्त केला गेला आहे. तसेच त्याने स्वत:सह कुटुंबियांच्या नावे कोट्यावधी रुपयांची माया जमवल्याचे समोर आले आहे. याशिवाय अशोक खरातने अनेक पतसंस्थांमध्ये आपली बँक खाती उघडली आहेत. या खात्यामधून कोट्यावधींचे व्यवहार झाले आहेत. खरात तब्बल 132 बँक खात्यांचा नॉमिनी असल्याचे उघड झाले आहे. त्यामुळे या प्रकरणाचा सध्या तपास सुरु आहे.

शिर्डी पोलिस ठाण्यात जमीन खरेदी व्यवहारात फसवणुकीचा गुन्हा दाखल होताच अशोक खरातची पत्नी कल्पना खरात ही तपास यंत्रंणाना गुंगारा देत फरार झाली. कल्पना खरातला अटक करण्यासाठी नाशिक, पुणे आणि अहिल्यानगर जिल्ह्यात तीन विशेष पथकं रवाना करण्यात आली आहेत. खरात दाम्पत्याचा मुलगा हर्षवर्धन हा देखील नॉट रिचेबल आहे. त्याची पोलिसांनी चौकशी केली होती, मात्र त्यानंतर तो अचानक गायब झाला.