Devendra Fadnavis: मुख्यमंत्री फडणवीस पुण्यात, 'त्या' नेत्याची भेट टाळली

Pune News : फलटण उपजिल्हा रुग्णालयात कार्यरत असलेल्या महिला डॉक्टरच्या आत्महत्येमुळे राज्यातील वातावरण चांगलेच तापले आहे. या घटनेनंतर राजकीय वर्तुळातून विविध प्रतिक्रिया समोर येत आहेत. या प्रकरणावरून माजी खासदारही अडचणीत आले आहेत. एकीकडे या प्रकरणावरुन राजकीय आरोप-प्रत्यारोपांनी राजकारण तापलं असतानाच मोठी अपडेट समोर आली आहे.

फलटणमधील महिला डॉक्टर आत्महत्या प्रकरणावरून उद्धव ठाकरे शिवसेनेच्या नेत्या सुषमा अंधारे यांनी पत्रकार परिषद घेत माजी खासदारांवर गंभीर आरोप करीत आहेत. त्यातच बुधवारी फडणवीस आणि माजी खासदार यांच्यात दुरावा निर्माण झाल्याचा प्रकार पुढे आला आहे.

एका कार्यक्रमाच्या निमित्ताने पुण्यातील ग्रँड टूर या हॉटेलमध्ये सीएम फडणवीस (Devendra fadnavis) आले होते. याच ठिकाणी माजी खासदारही आले होते, मात्र यावेळी या दोघांमध्ये कोणताही संवाद झालेला नाही.त्यांच्यासाठी हा मोठा झटका मानला जात आहे. सुषमा अंधारे यांच्या आरोपांनंतर फडणवीस आणि ते पहिल्यांदाच एकाच ठिकाणी आले होते, मात्र दोघांमध्ये बोलणे झाले नसल्याचे समजते. एका कार्यक्रमासाठी मुख्यमंत्री फडणवीस हे पुण्यात आले होते, मात्र यावेळी त्या ठिकाणी माजी खासदार हेही होते. यावेळी दोघांची भेट होणे अपेक्षित होते, मात्र दोघांमध्ये कोणतीही भेट झालेली नाही.

याआधी फलटणमधील एका कार्यक्रमात फडणवीस यांनी निंबाळकर यांच्यावर होत असलेल्या आरोपांचे खंडन करत त्यांनी क्लीन चिट दिली होती, मात्र आता चारच दिवसांनंतर फडणवीसांनी माजी खासदार यांच्याशी बोलणे टाळले आहे. त्यामुळे फडणवीस हे त्यांच्यावर नाराज असल्याचे संकेत मिळत आहेत.

निंबाळकरांची चौकशी करा : सुषमा अंधारे

सातारा डॉक्टर महिलेने काही पत्रे लिहिली होती. त्यांनी आरोग्य विभागाचे वरिष्ठ डॉ. अंशुमन धुमाळ यांना पत्र लिहिले होते. खासदारांचे दोन पीए आहेत. एपीआय झायपात्रे, पीएसआय पाटील, अंशुमन धुमाळ, माजी खासदारांचे दोन पीए तसेच त्यांनाही चौकशीच्या कक्षेत आणावे, अशी मागणी उद्धव ठाकरे यांच्या शिवसेनेच्या प्रवक्त्या सुषमा अंधारे यांनी केली होती.

दरम्यान, बुधवारी पुन्हा एकदा पत्रकार परिषद घेत सुषमा अंधारे यांनी आरोप केले आहेत. अंधारे यांनी आणखी एक खळबळजनक खुलासा केला आहे. डॉक्टर महिलेच्या हातावर लिहिलेल्या कथित सुसाईड नोटमधील एका शब्दाची वेलांटी चुकली असल्यानं त्यावरुन खळबळजनक दावा केला असून याद्वारे त्यांनी पोलीस तपासासमोर नवे आव्हान उभे केले आहे.