Congress vs BJP Maharashtra : दोन उपमुख्यमंत्र्यांना 'मॅनेज' करतानाच फडणवीसांची दमछाक; हर्षवर्धन सपकाळांच्या टोल्यानं महायुती 'घायाळ'

Maharashtra politics 2025 : काँग्रेस प्रदेशाध्यक्ष हर्षवर्धन सपकाळ यांनी महायुती सरकारच्या कामकाजाला जोरदार लक्ष्य केलं. मुख्यमंत्री देवेंद्र फडणवीस यांच्याकडे दोन महत्त्वाची खाती आहेत.

परंतु त्यांची सर्वाधिक दमछाक होते, ती दोन उपमुख्यमंत्री यांना मॅनेज करताना, असा टोला हर्षवर्धन सपकाळ यांनी लगावला. याचाच अर्थ, कामकाजापेक्षा महायुती सरकारमधील धुसफूस मोठी आहे, ती कधीही उफाळून येईल, असा दावा सपकाळ यांनी केला.

हर्षवर्धन सपकाळ पुणे दौऱ्यावर होते. त्यावेळी त्यांनी दैनिक 'सकाळ' पुणे (PUNE) कार्यालयाला भेट देत मुलाखत दिली. या मुलाखतीत त्यांनी काँग्रेसची राज्यातील वाटचाल, संघटन, मित्रपक्ष यावर भाष्य करताना, महायुती सरकारच्या धार्मिक आणि जातीय द्वेष राजकारणावर टीका केली.

काँग्रेसचे हर्षवर्धन सपकाळ यांनी मुख्यमंत्री देवेंद्र फडणवीस (Devendra Fadnavis) यांच्याकडे दोन महत्त्वाची खाती आहे. गृह आणि ऊर्जा, अशा महत्त्वाच्या खात्यांवर त्यांचे नियंत्रण नाही. त्यांचा सर्वाधिक दमछाक राज्यातील दोन उपमुख्यमंत्री मॅनेज करताना होते. परिणामी दोन्ही खात्यांवर दुर्लक्ष झालेले दिसते. वीज बिलात वाढ होणार नाही, अशी घोषणा केली जाते आणि अचानक वाढीव बिल येते. स्मार्ट मीटरमुळे 30 ते 40 टक्के वाढीव वीज बिल येऊ लागल्याने त्यात मोठा गैरव्यवहार दिसतो. मुख्यमंत्र्यांकडे ही खाती असून देखील गडबड आहे, असा गंभीर आरोप केला.

राज्यातील कायदा-सु्व्यवस्थेवर बोलताना, गृह खात्याला स्वतंत्र मंत्री असावा, अशी आमची मागणी आहे. राज्यात कोयता गँग, आका, खोक्या असले प्रकार वाढत चालले आहेत, असा गंभीर आरोप देखील हर्षवर्धन सपकाळ यांनी केला.

पंतप्रधान नरेंद्र मोदी यांचे मुख्यमंत्री देवेंद्र फडणवीस हे चाॅकलेट बाॅय असल्याचे सांगितले जाते. त्यांच लक्ष धारावी पुनर्विकास, नवी मुंबई विमानतळाचे काम आदानीला देणे, शक्तिपीठ महामार्ग करणे याकडे आहे, असा टोला देखील हर्षवर्धन सपकाळ यांनी मुख्यमंत्री फडणवीस यांना लगावला.