Fadnavis On Jayant Patil: शाह - जयंत पाटलांच्या भेटीचं खुद्द फडणवीसांनीच केलं खंडन !

Pune News: राष्ट्रवादीचे प्रदेशाध्यक्ष जयंत पाटील यांनी केंद्रीय गृहमंत्री अमित शाह यांची भेट घेतल्याच्या चर्चा राजकीय वर्तुळात सुरू आहेत. शाह रविवारी पुणे दौऱ्यावर असताना उपमुख्यमंत्री देवेंद्र फडणवीसांच्या मध्यस्थीने ही भेट झाल्याचे बोलले जात होते. मात्र, यानंतर जयंत पाटलांनीच या सर्व चर्चा फेटाळत आपली कुणाशीही भेट झाली नसल्याचा खुलासा माध्यमांसमोर केला.

यानंतर खुद्द देवेंद्र फडणवीस यांनीही अमित शाह आणि जयंत पाटलांच्या भेटीचे खंडन केले. शाह आणि पाटलांमध्ये कुठलीही भेट झाली नसल्याचे स्पष्टीकरण फडणवीसांनी दिले.

"काही लोकांना अफवा उठवायला आवडतात. माध्यमांनी देखील खात्री करुन बातम्या दिल्या पाहिजेत. जयंत पाटील यांची कुठलीही भेट अमित शाह यांच्याशी झालेली नाही. जे पतंगबाजी करत आहेत, त्यांना माझी विनंती आहे की, त्यांनी देखील स्तर ठेवला पाहिजे. कन्फर्मेशन केल्यानंतरच अशा बातम्या दिल्या पाहिजेत", असे फडणवीस म्हणाले.

गेल्या काही दिवसांपासून राज्याच्या राजकारणात अनेक घडामोडी घडत आहेत. शिवसेनेनंतर राष्ट्रवादी काँग्रेसमध्ये देखील फूट पडली. अजितदादा राष्ट्रवादीत बंड करत भाजपबरोबर सत्तेत सामील झाले. यानंतर आता जयंत पाटील हे देखील भाजपच्या वाटेवर असल्याची जोरदार चर्चा रंगली. मात्र, यानंतर स्वत: जयंत पाटलांनी खुलासा करत हे वृत्त फेटाळले. तर फडणवीसांनीही या भेटीचे खंडन केले.

Edited By- Ganesh Thombare