Devendra Fadnavis : ज्या फलटणमध्ये डाॅक्टर तरुणीची आत्महत्या तेथेच आज मुख्यमंत्री फडणवीसांचा कृतज्ञता मेळावा, काय भूमिका मांडणार?

Phaltan Doctor Case : फलटणमध्ये डाॅक्टर तरुणीने आत्महत्या केली. तिने सुसाईड नोटमध्ये पीएसआय गोपाळ बदने आणि प्रशांत बनकर यांच्यावर गंभीर आरोप केले आहेत. ज्या हाॅटेलमध्ये डाॅक्टर तरुणीने आत्महत्या केली त्याच्या समोरील यशवंतराव चव्हाण हायस्कूलच्या प्रांगणात आज (रविवारी) कृतज्ञता मेळाव्याचे आयोजन करण्यात आले आहे. मुख्यमंत्री देवेंद्र फडणवीस या मेळाव्याला उपस्थित राहणार आहेत.

नीरा- देवघर पाणी योजनेच्या कालव्याच्या दुसऱ्या टप्प्यातील कामांसह विविध विकासकामांचे भूमिपूजन कार्यक्रमाच्या निमित्ताने मुख्यमंत्री देवेंद्र फडणवीस यांच्या प्रमुख उपस्थितीत रविवार सकाळी १० वाजता फलटण येथे कृतज्ञता मेळाव्याचे आयोजन करण्यात आले आहे, अशी माहिती माजी खासदार रणजितसिंह नाईक-निंबाळकर यांनी दिली.

रणजितसिंह म्हणाले, 'फलटण तालुक्यासाठी अनेक वर्षांपासून प्रलंबित असलेल्या नीरा- देवघर पाणी योजनेच्या दुसऱ्या टप्प्यातील कालव्याच्या कामाला गती मिळाल्याबद्दल महायुती सरकारचे आभार मानणे, हा या मेळाव्याचा मुख्य उद्देश आहे.

यशवंतराव चव्हाण हायस्कूलच्या प्रांगणात होणाऱ्या या मेळाव्यात मुख्यमंत्री फडणवीस यांच्यासह जलसंपदामंत्री राधाकृष्ण विखे-पाटील, पालकमंत्री शंभूराज देसाई, सार्वजनिक बांधकाममंत्री शिवेंद्रसिंहराजे भोसले, ग्रामविकासमंत्री जयकुमार गोरे, खासदार उदयनराजे भोसले, आमदार सचिन पाटील यांची प्रमुख उपस्थिती असणार आहे.’’

याशिवाय दहिवडी –फलटण रस्त्याचे भूमिपूजन, ८५ कोटीच्या काँक्रीट रिंग रोडसह फलटण नगरपालिका क्षेत्रातील रस्त्यांची उद्घाटने, फलटण शहर आणि ग्रामीण पोलीस ठाण्याच्या इमारतीचे उद्घाटन , १०० कोटीची महसूल अंतर्गत प्रशासकीय इमारत व अतिरिक्त जिल्हाधिकारी कार्यालयाचे भूमिपूजन, बारामती प्रमाणे फलटणमधून वाहणाऱ्या निरा उजव्या कालव्याचे सुशोभिकरण प्रकल्प , सेशन कोर्ट, महसूल भवन इत्यादी अनेक कामांचे भूमिपूजन व उद्घाटन सोहळा पार पडणार आहे.

मुख्यमंत्र्यांच्या दौऱ्याकडे लक्ष

मुख्यमंत्र्यांच्या दौऱ्याच्या दोन दिवसांपूर्वी घडलेल्या या गंभीर आणि संवेदनशील घटनेमुळे राज्यभर खळबळ उडाली आहे. त्यातच या प्रकरणात राजकीय दबाव होता, असा संशय विरोधकांकडून व्यक्त होत आहे. त्यावर मुख्यमंत्री आपल्या दौऱ्यादरम्यान काय भाष्य करणार, तसेच तपासासंदर्भात काय निर्देश देणार याकडे संपूर्ण राज्याचे लक्ष लागून राहिले आहे.