Chinchwad by-election : राहुल कलाटेंची 'शिट्टी' वाजणार की ते ती आघाडीची वाजविणार?

पिंपरी : चिंचवड विधानसभा मतदारसंघ पोटनिवडणुकीसाठी आज दुपारी ३ वाजेपर्यंत उमेदवारी मागे घेण्याची मुदत होती. त्या कालावधीत पाच उमेदवारांनी अर्ज मागे घेतले. त्यानंतर रिंगणात राहिलेल्या २८ उमेदवारांना लगेचच चिन्ह वाटप करण्यात आले.

चिंचवडच्या लढतीतील शिवसेना बंडखोर आणि प्रमुख अपक्ष राहुल कलाटे यांना शिट्टी हे निवडणूक चिन्ह मिळाले आहे. त्यामुळे त्यांची शिट्टी वाजणार का म्हणजे ते निवडून येणार का, की आघाडीच्या उमेदवाराची (राष्ट्रवादी काँग्रेसचे नाना काटे) ती ते वाजविणार अशी चर्चा चिन्ह वाटपानंतर ऐकायला मिळाली.

गत विधानसभेला २०१९ ला कलाटेंनी बंडखोरी करीत अपक्ष निवडणूक लढवली होती. त्यावेळी त्यांचे बॅट हे चिन्ह होते. पण, तिचा फटका बसला नाही. चौकार वा सिक्सर गेला नाही अन् त्यांचा पराभव झाला. यावेळीही तसे झाले, तर त्यांची विधानसभेच्या पराजयाची हॅटट्रिक होईल. गतवेळी दुहेरी लढत होती. यावेळी, मात्र कलाटेंमुळे ती तिरंगी म्हणजे युती, आघा़डी आणि अपक्ष म्हणून ते अशी होणार आहे. यावेळी बॅट हे चिन्ह अपक्ष किशोर काशीकर यांना मिळाले आहे.

'चिंचवड'चे निवडणूक निर्णय अधिकारी सचिन ढोले यांच्या कक्षात चिन्ह वाटप करण्यात आले. राष्ट्रीय व राज्यस्तरावरील मान्यताप्राप्त राजकीय पक्षांच्या उमेदवारांना त्या पक्षांसाठी राखीव असलेली चिन्हे देण्यात आली. तर नोंदणीकृत राजकीय पक्षांच्या उमेदवारांसह अन्य उमेदवारांना केंद्रीय निवडणूक आयोगाने सूचीबद्ध केलेल्या १९७ मुक्त चिन्हांमधून उमेदवारांनी दिलेला पसंतीक्रम विचारात घेऊन चिन्हवाटप करण्यात आले.

त्याची सोडत शालेय विद्यार्थ्यांच्या हस्ते काढण्यात आली. यावेळी सहाय्यक निवडणूक अधिकारी अजित पाटील, निवडणूक सहायक तथा तहसीलदार नागेश गायकवाड, प्रशांत शिंपी, माध्यम कक्ष समन्वय अधिकारी किरण गायकवाड यांच्यासह उमेदवार आणि त्यांचे प्रतिनिधी उपस्थित होते. अपक्षांपैकी कुणाला बॅटरी, कुणाला रिक्षा, कुणाला खाट, बॅट, कपाट, टेबल, गॅस सिंलिंडर, फुटबॉल, अंगठी, कॅमेरा, हेलिकॉप्टर, सफरचंद, जहाज, शिवणयंत्र, तर कुणाला शिवणयंत्र अशी चिन्हं देण्यात आली आहेत.