Pune NCP Office: राष्ट्रवादीचं पुण्याचं पक्ष कार्यालय अनधिकृत जागेत? चंद्रशेखर बावनकुळे घालणार लक्ष

Pune NCP Office: मुंढव्यातील ४० एकर जागेच्या गैरव्यवहारात ३०० कोटी रुपयांच्या कथित घोटाळा प्रकरणात पुत्र पार्थ पवारांचं नाव आल्यानंतर आता आणखी एका ३०० कोटी रुपयांच्या कथित घोटाळा प्रकरणात अजित पवारांवर आरोप करण्यात आले आहेत. पुण्यातील सामाजिक कार्यकर्ते विजय कुंभार यांनी हे आरोप केले आहेत. या आरोपांसंदर्भात पत्रकारांनी विचारणा केल्यानंतर यात लक्ष घालण्याचं आश्वासन महसूल मंत्री चंद्रशेखर बावनकुळे यांनी दिलं आहे.

काय आहे प्रकरण?

डेक्कन शुगर टेक्नॉलॉजिस्ट (DSTA) या साखर उद्योगातील तंत्रज्ञान आणि ज्ञानाचा प्रसार करण्यासाठी १९३६ मध्ये स्थापन झालेल्या संस्थेबाबतचा हा विषय आहे. या संस्थेच्या पुण्यातील जागेत अजित पवार यांच्या राष्ट्रवादी काँग्रेस पक्षाचं कार्यालय उभं राहिल्याचा आरोप विजय कुंभार यांनी नुकताच केला आहे. DSTA ही संस्था धर्मादाय आयुक्तांच्या अतंर्गत येते. या संस्थेला धर्मादाय आयुक्तांनी 'कल्पवृक्ष प्लांटेशन प्रायव्हेट लिमिटेड' या कंपनीला ६० वर्षांच्या करारानं ही जागा भाड्यानं दिली होती. पण या जागेच्या विक्रीचा अधिकार नसतानाही संबंधित कंपनीनं यातील काही भाग परस्पर विकून ३०० कोटी रुपयांचा गैरव्यवहार केल्याचा आरोप कुंभार यांनी केला आहे.

घोटाळ्यात लक्ष घालणार

दरम्यान, सध्या महसूल खात्याचे मंत्री चंद्रशेखर बानवकुळे आहेत. पुण्यात प्रचारादरम्यान आल्यानंतर पत्रकारांनी त्यांना या कथित घोटाळ्याबाबत विचारणा केली. त्यावर बोलताना बावनकुळे म्हणाले, ‘‘राष्ट्रवादी काँग्रेसचे कार्यालय कोणाच्या जागेत आहे याची माहिती मला नाही. पण त्यामध्ये मी लक्ष घालेन. तसंच मुंढवा जमीन गैरव्यवहाराची चौकशी करण्यासाठी राज्य सरकारने नेमलेल्या खरगे समितीची पहिली एक महिन्यांची मुदतवाढही उलटून गेली आहे. पण त्याचा अहवाल अद्यापही सरकारला का प्राप्त झालेला नाही? याबाबतही पत्रकारांनी विचारणा केल्यानंतर त्यात काही जणांची साक्ष घेण्याचे काम बाकी आहे, ते झाल्यानंतर त्याबाबतचा अहवाल सादर केला होईल, अशी माहिती यावेळी चंद्रशेखर बावनकुळे यांनी दिली.

अजित पवारांना दिला सल्ला

तसंच पुण्यातील महापालिका निवडणुकीदरम्यान अजित पवारांकडून होत असलेल्या आरोपांना उत्तर देताना बावनकुळे म्हणाले, केंद्र सरकार आणि राज्य सरकारच्या प्रत्येक प्रकल्पाच्या उद्‍घाटनाच्या कार्यक्रमात उपमुख्यमंत्री अजित पवार हे सहभागी झालेले आहेत. बैठकांनाही ते उपस्थित होते, त्यावेळी त्यांनी पुण्यातील कामाचे कौतुक केलं आहे. त्यामुळं पुण्याचा विकास झाला नाही असं त्यांनी म्हणू नये. अजितदादांनी भाजपचे नाव घेऊन टीका करण्याची गरज नाही तसंच पुण्यातील स्थानिक नेत्यांवर टीका करून स्वतःची उंची कमी करून घेऊ नये, अशा शब्दांत चंद्रशेखर बावनकुळे यांनी अजित पवारांना सल्ला दिला आहे.