Pune Land Scam : पुण्यातील जमीन गैरव्यवहार प्रकरणी मोठी अपडेट, तिघांवर गुन्हा दाखल; निलंबित अधिकाऱ्याच्या अडचणी वाढल्या

Land Scam : पुण्यातील मुंढवा भागातील 40 एकर जमीनच्या गैरव्यवहार प्रकरणात मोठी अपडेट समोर आली आहे. या व्यवहारात सहा कोटींचे मुद्रांक शुल्क न भरता शासनाची फसवणूक केल्या प्रकरणी सह जिल्हा निबंधक संतोष हिंगाणे यांनी बावधन पोलिस ठाण्यात फिर्याद दिली आहे. त्यानुसार तिघांवर गुन्हा दाखल झाला आहे.

गुन्हा दाखल झालेल्यांमध्ये दिग्विजय पाटील, शीतल तेजवानी आणि निलंबित सहदुय्यम निबंधक रवींद्र तारू यांचा समावेश आहे. निलंबनानंतर गुन्हा दाखल झाल्यानंतर तारु यांच्या अडचणीत वाढ झाली आहे.

या जमीन व्यवहार प्रकरणात उपमुख्यमंत्री अजित पवार यांचे पुत्र पार्थ पवार यांच्यावर आरोप करण्यात येत होते. या प्रकरणात मुख्यमंत्री देवेंद्र फडणवीस यांनी चौकशीचे आदेश दिले आहेत. दरम्यान, अजित पवार यांनी पार्थ पवार यांच्यावर होत असलेल्या कथित जमीन गैरव्यवहार प्रकरणाशी माझा कोणताही संबंध नसून, आजपर्यंत कोणत्याही नातेवाईकाच्या कामासाठी कोणत्याही अधिकाऱ्याला मी कधीच फोन केलेला नाही, असे सांगितले.

संतोष हिंगाणे यांनी दिलेल्या फिर्यादिनुसार, या व्यवहारत जमीनचे खरेदी-विक्री दस्त करण्यासाठी सक्षम अधिकाऱ्याच्या परवानग्या घेणे आवश्यक होते. तसेच 5 कोटी 89 लाख 31 हजार रुपये मुद्रांक शुल्क भरणे आवश्यक असल्याना आरोपींनी मुद्रांक शुल्क भरले नसल्याचे फिर्यादीत म्हटले आहे.

दस्त नोंदणीत अनियमितता

या दस्त नोंदणीत गंभीर अनियमितता असून पक्षकारांनी शासनाला फसवत दस्तनोंदणी केल्याचे दिसून आले आहे, असे फिर्यादीत म्हटले आहे. याबाबत दस्तातील लिहून देणार यांचे "कुलमुखत्यारधारक शीतल तेजवानी आणि लिहून घेणार 'अॅमेडिया एंटरप्राइजेस एलएलपी' कंपनीतर्फे भागीदार दिग्विजय पाटील यांच्याविरुद्ध तसेच त्यांना मदत करणाऱ्या दुय्यम निबंधक रविंद्र तारू याच्यावर फौजदारी कारवाई करावी," असे आदेश नोंदणी उपमहानिरीक्षक उदयराज चव्हाण यांनी सह जिल्हा निबंधकांना दिले.