Pune Politics : पुण्यातून राजकारण फिरणार: दोन्ही शिवसेना एकत्र येण्याबाबत चर्चा; पवारांची राष्ट्रवादी सोबतीला

Pune News: आगामी स्थानिक स्वराज्य संस्थांच्या निवडणुकांसाठी सर्वच राजकीय पक्ष तयारीला लागले आहेत. सर्व पक्षांकडून निवडणुकीसाठी मोर्चे बांधणी सुरू करण्यात आली असली तरी नेमकी महाविकास आघाडी आणि महायुतीची पक्षीय समीकरणे कशी असणार याबाबत अद्याप स्पष्टता आली नाही.

सर्व पक्षांच्या प्रमुखांनी आघाडी आणि युतीचे अधिकार हे स्थानिक नेत्यांना दिल्याने स्थानिक स्वराज्य संस्थांच्या निवडणुकांमध्ये वेगवेगळ्या युती आणि आघाड्यांचे प्रयोग पाहायला मिळणार आहेत.

अशातच पुण्यातून नवीन युतीचे संकेत हे मिळू लागले आहेत. पुणे जिल्ह्यामध्ये उपमुख्यमंत्री एकनाथ शिंदे यांचे शिवसेना आणि ठाकरेंची शिवसेना तसेच राष्ट्रवादी काँग्रेस शरदचंद्र पवार पक्ष यांचा पक्ष एकत्रित येऊन निवडणुकीला सामोरे जाण्याचा विचार करत असल्याचे समोर आला आहे.

उत्तर पुणे जिल्ह्यातील जुन्नर, खेड, आंबेगाव या तीन तालुक्यांमध्ये दोन्ही शिवसेना आणि राष्ट्रवादी काँग्रेस (शरद पवार) यांनी एकत्र येत निवडणुका प्राथमिक चर्चा झाल्या असल्याचे समोर आला आहे. याबाबत तीनही जिल्हाप्रमुख आणि अध्यक्षांची बैठक देखील झाली असल्याचे बोलले जात आहे. याबाबत जागा वाटप लवकरच जाहीर होणार असल्याचे तीनही नेत्यांनी सांगितले आहे.

याबाबत सरकारनामाशी बोलताना राष्ट्रवादी काँग्रेसचे (शरद पवार) जिल्हाध्यक्ष देवदत्त निकम म्हणाले, "दोन्ही शिवसेना आणि आम्ही एकत्र लढण्याबाबत शिवसेनेचे जिल्हाप्रमुख देविदास दरेकर आणि ठाकरे गटाचे सुरेश भोर यांच्यासह एकत्रित चर्चा केली आहे. नियोजित बैठक झाली नसली तरी एका कार्यक्रमानिमित्त आम्ही एकत्र आलो असताना याबाबत चर्चा झाली आहे.

आम्ही सर्व सकारात्मक असून, वरिष्ठ पातळीवरून देखील स्थानिक पातळीवर निर्णय घेण्याचे सांगण्यात आले. यामुळे वेगळी समीकरण जनतेसमोर घेऊन निवडणुकांमध्ये जास्तीत जास्त जागा निवडून आणण्याचे आमचे प्रयत्न आहेत.

शिवसेनेचे (शिंदे गट) जिल्हाप्रमुख देविदास दरेकर यांनी देखील याबाबत आपली भूमिका स्पष्ट केली आहे, की दोन्ही शिवसेना आणि राष्ट्रवादी काँग्रेस शरदचंद्र पवार पक्ष एकत्र येऊन लढण्याचा विचार मांडला आहे. तीनही पक्षांच्या स्थानिक नेत्यांना तो पटला आहे. मात्र अद्याप याबाबत निर्णय झालेला नाही. वरिष्ठांच्या सूचनेनुसार पुढे जाऊ.

शिवसेना उद्धव बाळासाहेब ठाकरे पक्षाचे जिल्हाप्रमुख सुरेश भोर यांनी सांगितलं की आम्हाला अद्याप पक्षनेतृत्वाकडून स्थानिक पातळीवरील या संदर्भात सूचना मिळालेल्या नाही. पक्षाची भूमिका ही शिंदे गटासोबत जाण्याची नाही. त्यामुळे आम्ही याबाबत पक्षनेतृत्वाकडे भूमिका मांडून वरिष्ठांच्या सूचनेनुसार निवडणुकांना सामोरे जाऊ.