Pune Municipal Elections : ठरलं तर, आगामी पुणे महापालिका निवडणुका महायुती एकत्रित लढणार; पक्षश्रेष्ठींच्या सूचना

Pune News : आगामी काळात होत असलेल्या स्थानिक स्वराज्य संस्थांच्या निवडणुकीमध्ये महायुती आणि महाविकास आघाडीतील मित्रपक्ष एकत्रित निवडणूक लढणार की स्वबळाचा नारा देणार? याकडे सबंध महाराष्ट्रातील कार्यकर्ते आणि पदाधिकाऱ्यांचे लक्ष लागले आहे.

पुणे महानगरपालिकेचा विचार केल्यास आगामी महापालिकेची निवडणूक महाविकास आघाडी म्हणूनच लढावी यासाठी आघाडीतील तिन्ही मित्र पक्षांमधील स्थानिक नेते आग्रही असल्याचे पाहायला मिळत आहे. मात्र दुसरीकडे महायुतीमध्ये भाजप (BJP) स्वबळावर निवडणूक लढवण्यासाठी आग्रही आहे. स्वबळावर आपल्याला महापालिका निवडणुकीत बहुमत मिळेल, असा विश्वास स्थानिक नेत्यांना आहे. त्यामुळे महायुतीतील सर्वात मोठा पक्ष असलेला भाजप स्वबळाचा नारा देत असताना दुसरीकडे उपमुख्यमंत्री एकनाथ शिंदे यांची शिवसेना आणि उपमुख्यमंत्री अजित पवार यांच्या राष्ट्रवादी काँग्रेसने महायुती म्हणूनच निवडणूक लढवावी, यासाठी आग्रही असल्याचे सांगितले जात आहे.

अशातच पुणे महापालिका निवडणुकीसंदर्भात पक्षश्रेष्ठीकडून काही सूचना आल्या असल्याचे शिवसेना (Shivsena) नेत्या तथा विधान परिषदेच्या उपसभापती नीलम गोऱ्हे यांनी शिवसेनेच्या कार्यकर्त्यांना सांगितले. महानगरपालिकेच्या निवडणुका महायुतीच्या वतीने लढविल्या जाणार असल्याच्या पक्षश्रेष्ठीच्या सूचना आल्या असल्याचे त्यांनी एका कार्यक्रमादरम्यान सांगितले.

पुणे शहरातील कोथरूड विधानसभा मतदारसंघात शिवसेना नेत्या आणि उपसभापती विधानपरिषद डॉ. नीलम गोऱ्हे यांच्या हस्ते शिवसेना सदस्य नोंदणी आणि आरोग्य शिबिराचा कार्यक्रम नुकताच पार पडला. या कार्यक्रमाचे उपशहरप्रमुख नितीन पवार यांनी आयोजन केले होते.

त्यावेळी डॉ. गोऱ्हे म्हणाल्या, 'राज्यभरात महायुती सरकाराच्या माध्यमांतून आरोग्य शिबिराचे आयोजन केले जात आहे. त्या शिबिराना नागरिकांचा मोठ्या प्रमाणावर प्रतिसाद मिळत आहे. त्यातून एखाद्या नागरिकांला कोणत्याही आजाराचे निदान झाल्यास तात्काळ पुढील उपचार दिले जात आहेत. जेणेकरून भविष्यातील आरोग्या विषयक धोके टाळणे शक्य होते.'

त्या दृष्टीने रविवारी कोथरूड विधानसभा मतदारसंघात आरोग्य शिबिराचे आयोजन केले आहे. या आरोग्य शिबिराचा लाभ प्रत्येकाने घ्यावा, या निमित्ताने मी सर्वांना एक सांगू इच्छिते की, आपल्या सर्वांच्या पाठीशी महायुती सरकार आणि उपमुख्यमंत्री एकनाथ शिंदे आहेत. तसेच आपल्या सर्वांचे आशिर्वाद कायम आमच्या पाठीशी राहू द्या,असे आवाहन देखील डॉ. गोऱ्हे यांनी उपस्थित नागरिकांना केले.

नीलम गोऱ्हे पुढे म्हणाल्या, 'कोथरूड विधानसभा मतदारसंघ हा महायुतीचा बालकिल्ला आहे. पण कोथरूड आणि शिवाजीनगर हे दोन मतदारसंघ तसेच पुण्यातील अनेक भाग शिवसेनेचे बालकिल्ले राहिले आहेत. लोकसभा आणि विधानसभा निवडणुकीत आपल्या शिवसैनिकांनी प्रामाणिकपणे काम केले आहे. आता येत्या कालावधीत महानगरपालिकेची निवडणुक होणार आहे. त्या निवडणुका महायुतीच्या वतीने लढविल्या जाणार असल्याच्या सूचना पक्षश्रेष्ठीच्या असल्याचे त्यांनी सांगितले.