Katraj Dairy : ‘कात्रज’चा कारभार वादात : बोगस संस्था अन्‌ कोट्यवधींच्या उधळपट्टीची 2 महिन्यांत चौकशी; मंत्र्यांची घोषणा

Pune, 07 July : सहकारी क्षेत्रातील महत्त्वाची संस्था असलेल्या पुणे जिल्हा सहकारी दूध उत्पादक संघात म्हणजेच कात्रज डेअरी सध्या 'दूध का दूध, पाणी का पाणी' होण्याची वेळ आली आहे. संघातील कथित आर्थिक गैरव्यवहार, बोगस दूध संस्थांचे पेव आणि निधीच्या उधळपट्टीचा मुद्दा भाजप आमदार योगेश टिळेकर यांनी विधीमंडळात ‘लक्षवेधी’च्या माध्यमातून मांडला. त्यावर दुग्धविकास मंत्री अतुल सावे यांनी येत्या दोन महिन्यांत चौकशी करून दोषींवर कठोर कारवाई करण्याचे आश्वासन दिले आहे.

आमदार योगेश टिळेकर यांनी विधान परिषदेत आक्रमक पवित्रा घेत कात्रज डेअरीच्या कारभाराचे अक्षरशः वाभाडे काढले. संघामध्ये केवळ कागदावर चालणाऱ्या बोगस दूध संस्था, बनावट वाहतूक देयके (ट्रान्सपोर्ट बिले), खोट्या नोंदी आणि उपविधींचे उल्लंघन झाल्याचा गंभीर आरोप त्यांनी केला.

एवढ्यावरच न थांबता कोंढापुरी येथील पशुखाद्य कारखान्यातील संशयास्पद खरेदी, नवीन डेअरी प्रकल्पाच्या नावाखाली सल्लागारावर झालेली सुमारे एक कोटी रुपयांची उधळपट्टी आणि वार्षिक सर्वसाधारण सभेवर झालेला अवास्तव खर्च या मुद्द्यांकडे त्यांनी सभागृहाचे लक्ष वेधले.

टिळेकर यांनी या संपूर्ण घोटाळ्याची 'विशेष तपास पथका' मार्फत चौकशी होणार का? बोगस दूध संस्थांची मान्यता तातडीने रद्द करणार का? आणि मागील ५ वर्षांचे विशेष ऑडिट करून सहकार आणि अन्न व औषध प्रशासनाच्या अधिकाऱ्यांचा चौकशीत समावेश करणार का? असा सवाल उपस्थित केला.

यावर दुग्धविकास मंत्री अतुल सावे यांनी सरकारची बाजू मांडली. येत्या १० आणि ११ जून रोजी स्थापन करण्यात आलेली चौकशी समिती या संपूर्ण प्रकरणाचा कसून तपास करत असून, दोन महिन्यांत सविस्तर अहवाल सादर करण्याचे आदेश दिल्याचे त्यांनी सांगितले.

दूध भेसळ आणि बोगस संस्थांच्या मुळाशी जाण्यासाठी आवश्यक पडल्यास अन्न व औषध प्रशासन विभागाच्या अधिकाऱ्यांचाही समितीत समावेश केला जाईल, अशी ग्वाही त्यांनी दिली. अहवाल हाती येताच दोषींवर कोणतीही दिरंगाई न करता थेट आणि कठोर कायदेशीर कारवाई केली जाईल, असे सावे यांनी स्पष्ट केले.