Nilesh Ghaiwal Crime : निलेश घायवळचं आणखी एक कांड; 'सावंतसाहेबांचं नाव कशाला घेतोस' म्हणत धमकावलं, ऑडियो व्हायरल

Pune News: पुण्यातील कोथरुड परिसरात कुख्यात गुंड निलेश घायवळची मोठी दहशत होती. घायवळवर खून,खुनाचा प्रयत्न यांसह पुण्यातील विविध पोलीस ठाण्यात 23 ते 24 गुन्हे दाखल आहेत. गेल्या काही दिवसांपासून तो लंडनला पळाल्याची चर्चा असतानाच पुणे पोलीस आयुक्त अमितेश कुमार यांनी तो सध्या स्वित्झर्लंडमध्ये असल्याची माहिती दिली होती. यानंतर पुणे पोलिसांनी घायवळच्या भोवतीचा कारवाईचा फास आवळण्यास सुरुवात केली आहे. याचदरम्यान, त्याचं आणखी एक कांड समोर आलं आहे.

पुणे पोलिसांसाठी 'वाँटेड' असलेल्या निलेश घायवळचे (Nilesh Ghaiwal) अनेक प्रताप समोर येत असतानाच आता त्याचा आणखी एक व्हॉट्सअँप कॉल व्हायरल झाला आहे. एका व्यावसायिकाला घायवळने व्हाट्सअप कॉलद्वारे धमकी देण्याचा एक व्हिडिओ आता सोशल मीडियावर तुफान व्हायरल झाला आहे. यामुळे मोठी खळबळ उडाली आहे. हा ऑडियो धाराशिवमधील असल्याचे सांगितले जाते.

निलेश घायवळ याने व्हॉट्सअॅप कॉलद्वारे संबंधित व्यावसायिकाला तुझे दुकानं बंद पाडतो, सावंतसाहेबांचं नाव कशाला घेतो अशी धमकी दिल्याचा हा व्हिडिओ रेकॉर्ड करण्यात आला आहे. नेमका हा व्यवसायिक कोण आहे, याबद्दल अधिकृत माहिती समोर आलेली नाही. पण यामुळे पुणे पोलिसांसह (Pune Police) आता धाराशिव पोलिसांचीही गुंड निलेश घायवळच्या प्रकरणात एन्ट्री होण्याची शक्यता आहे.

आत्ता या परिस्थितीमध्ये सावंत साहेबाला (Tanaji Sawant) मध्ये का घेतोस. ... मी घरी येतो नाहीतर तू घरी ये..शिवीगाळ करत तू इकडे धंदा करायचं नाही. पुण्यात जाऊन धंदे कर. पुण्यातील धंदे बंद करतो.. दिनेश नावाचे व्यक्तीने हा व्हिडिओ कॉल रेकॉर्ड केल्यानं आधीच अडचणीत आलेल्या घायवळच्या पोलिसांच्या कारवाईचा फास आणखी आवळला जाण्याची शक्यता आहे.

पुणे पोलिसांनी कोथरुडमधील गोळीबार प्रकरणी निलेश घायवळ कनेक्शन समोर आल्यानंतर त्याच्याभोवतीचा कारवाईचा फास चांगलाच आवळण्यास सुरुवात केली आहे. दुचाकी,चारचाकी वाहनं जप्त करताना पोलिसांनी घायवळच्या गँगमधील काही साथीदारांना बेड्या ठोकल्या होत्या. या कारवाईनंतरच निलेश घायवळ थेट लंडनला पळून गेल्याचं समोर आलं. यानंतर आता पुणे पोलिसांनी त्याच्या मालमत्तेवरही टाच आणताना त्याची 10 बँक खाती गोठवली आहेत.