NCP News : चाकणकर यांच्या विरोधातील आंदोलन भोवलं; रुपाली ठोंबरेंवर पक्षाची अ‍ॅक्शन; 7 दिवसांचा अल्टिमेटम

Pune News : उपमुख्यमंत्री अजित पवार यांच्या राष्ट्रवादी काँग्रेसच्या महिला प्रदेशाध्यक्ष आणि महिला आयोगाच्या अध्यक्ष रुपाली चाकणकर आणि पक्षाच्या प्रवक्त्या रुपाली ठोंबरे यांच्यामध्ये गेल्या काही दिवसांपासून वाद रंगला आहे. रुपाली पाटील-ठोंबरे यांनी काही दिवसांपूर्वी चाकणकरांविरोधात आंदोलन देखील केलं होतं.

फलटण येथील महिला डॉक्टर आत्महत्या प्रकरणांमध्ये चाकणकर यांनी तरुणीचं चारित्र्यहनन केला असल्याचा आरोप करत रुपाली ठोंबरे यांनी चाकणकर यांच्यावर गंभीर आरोप केले होते. या दोन्हीही पक्षाच्या पदाधिकाऱ्यांमध्ये सुरू असलेल्या वादाची दखल पक्षाने घेतली आहे. त्याबाबत रुपाली ठोंबरे यांना पक्षाकडून कारणे दाखवा नोटीस देण्यात आली आहे.

संघटक सरचिटणीस संजय खोडके रूपाली ठोंबरे यांना ही नोटीस पाठवली आहे. या नोटीसीमध्ये आपणास राष्ट्रवादी काँग्रेस पक्षाच्या प्रदेश प्रवक्ते पदाची जबाबदारी दिली असताना आपण राज्य महिला आयोगाच्या अध्यक्ष व पक्षाच्या महिलाध्यक्षा यांच्याबाबत प्रसारमाध्यमांमध्ये केलेले वक्तव्य हे पक्षशिस्त भंग करणारे आहे.म्हणून आपल्या विरुद्ध शिस्तभंगाची कारवाई का करण्यात येऊ नये याचा खुलासा करण्यास सांगितले आहे.

खुलास करण्यासाठी दिवसांची मुदत देखील दिली आहे. सात दिवसांच्या आत खुलासा करावा अन्यथा आपल्या विरुद्ध योग्य ती पुढील कार्यवाही करण्यात येईल, याची कृपया नोंद घ्यावी असे देखील नोटीसीमध्ये नमूद करण्यात आले आहे. तसेच या नोटिशीची प्रत उपमुख्यमंत्री अजित पवार प्रदेशाध्यक्ष सुनील तटकरे आणि राष्ट्रीय कार्याध्यक्ष प्रफुल्ल पटेल यांना देण्यात आली आहे.

रुपाली ठोंबरे काय म्हणाल्या?

याबाबत रुपाली ठोंबरे म्हणल्या, आज पक्षाकडून जगातील महिलांना न्याय देणाऱ्या महिला आयोगाच्या अध्यक्षाविषयी केलेल्या वक्तव्याविषयी खुलासा मागण्यात आलेला आहे. खरं तर खुलासा देण्याची वेळ 7 दिवस अत्यंत कमी वेळ देण्यात आली आहे. मी वैयक्तिक हितसंबध ते हगवणे प्रकरण ते आमच्या भगिनी कैलासवाशी डॉक्टर संपदा मुंडेंच्या चारित्र्यहनन प्रकरणापर्यंतचा सविस्तर खुलासा देण्यात येईल. ज्यांनी मयत भगिनीचे चारित्र्यहनन केले त्याच्या विषयी खरतर काय खुलासा द्यावा? असं रुपाली ठोंबरे म्हणाल्या.