Pune News: पुणे आणि पिंपरी चिंचवडमध्ये दोन्ही राष्ट्रवादी काँग्रेस एकत्र लढण्यावर अखेर शिक्कामोर्तब झाला आहे. या दोन्ही महापालिकेसाठी जागा वाटपाचा आणि चिन्हाचाही फॉर्म्युला ठरला आहे. पुण्यात अजितदादांच्या राष्ट्रवादीला 125 आणि शरद पवारांच्या राष्ट्रवादीला 40 जागा मिळाल्या आहेत. अजित पवार यांच्या प्रमुख उपस्थितीत झालेल्या या बैठकीत जागा वाटपाचा तिढा सोडविण्यात आला. चिन्हाचा प्रश्नही सुटला आहे.
घड्याळ आणि तुतारी या चिन्हांबाबत दोन्ही पक्षांनी रणनीती आखली आहे. एका प्रभागात जर 3 उमेदवार घड्याळ चिन्हाचे असतील आणि 1 उमेदवार तुतारी चिन्हावर लढणार असेल तर, तिथे चारही उमेदवार घड्याळ याच चिन्हावर निवडणूक लढतील. ज्या प्रभागात 3 तुतारीचे उमेदवार असतील आणि 1 घड्याळाचा उमेदवार असेल तर तिथे चारही उमेदवार तुतारी याच चिन्हावर निवडणूक लढतील, असा निर्णय बैठकीत घेण्यात आला आहे.
याबरोबरच एखाद्या प्रभागात 2 घड्याळ आणि 2 तुतारीचे उमेदवार असतील, तर त्या ठिकाणी उमेदवारांना सहमतीने एकाच चिन्हावर निवडणूक लढण्याचा निर्णय घेण्याचा अधिकार असणार आहे. चिन्हाबाबतची ही रचना केवळ मतदारांचा गोंधळ उडू नये आणि प्रतिस्पर्धी उमेदवारांना त्याचा फायदा घेता येऊ नये, याचा विचार करून दोन्ही पक्षांनी ही रणनिती आखली आहे.
भाजप प्रमाणेच राष्ट्रवादी काँग्रेस पक्षानेही आपल्या उमेदवारांची यादी जाहीर न करण्यावर भर दिला आहे. त्यानुसार अखेरपर्यंत यादी जाहीर न करता बंडखोरीवर नियंत्रण आणण्याचे नियोजन पक्षाने केले आहे. तर, उपमुखमंत्री पवार यांच्याकडून सोमवारी रात्री उशिरापर्यंत उमेदवारी यादी अंतिम करून त्यानंतर उमेदवारी निश्चित झालेल्या उमेदवाराकडे थेट एबी फॉर्म पोचविण्याची व्यवस्था करण्याचे देखील निश्चित करण्यात आले आहे.
महापालिका निवडणुकीत महाविकास आघाडीला डावलून राष्ट्रवादी काँग्रेस पक्ष व राष्ट्रवादी काँग्रेस शरदचंद्र पवार पक्ष एकत्र निवडणूक लढणार होते, मात्र दोन्ही पक्षांमध्ये जागा वाटप व चिन्हाच्या कारणावरून प्रारंभ बोलणी बिनसली. रविवारी रात्रीनंतर मात्र दोन्ही राष्ट्रवादीमधील अंतर्गत घडामोडींना कमालीचा वेग येऊन अखेर पुन्हा एकदा दोन्ही राष्ट्रवादी एकत्र येणार असल्याच्या चर्चेला उधाण आले. त्यानंतर वेळ न दवडता दोन्हीकडील नेत्यांनी जागा वाटपाच्या चर्चेस सुरुवात केली.
उपमुख्यमंत्री अजित पवार यांनीही रविवारी बारामतीमधील कार्यक्रमास हजेरी लावल्यानंतर रात्री उशिरा तातडीने पुणे गाठले. त्यानंतर रविवारी रात्रीपासून ते सोमवारी सकाळपर्यंत जागा वाटपाबाबत चर्चेच्या काही फेऱ्या झाल्या. उपमुखमंत्री पवार, शहराध्यक्ष सुभाष जगताप, सुनील टिंगरे, राष्ट्रवादी काँग्रेस शरदचंद्र पवार पक्षाचे नेते अंकुश काकडे, विशाल तांबे यांच्यात बैठक झाली. त्यामध्ये जागा वाटपाचे गणित अखेर सोडविण्यात आले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.