Pune Municipal Election : भाजपनं फिरवली चक्रं; राष्ट्रवादी अन् सेनेला अंधारात ठेवून टाकणार मोठा डाव...

Pune News : नगरपालिका आणि नगर परिषद निवडणुकांच्या प्रक्रियेला आता वेग आला आहे. या निवडणुकीच्या मतदान प्रक्रियेसाठी अवघे काही दिवस शिल्लक राहिल्याने आता उमेदवार निश्चितीच्या कार्यक्रमाला भाजपकडून सुरुवात करण्यात आली आहे. याच दृष्टिकोनातून आता निवडणूक लढण्यास इच्छुक उमेदवारांच्या मुलाखतीचा कार्यक्रम भाजपकडून हाती घेण्यात आला आहे.

पुणे जिल्ह्याचे निवडणूक प्रभारी म्हणून केंद्रीय मंत्री आणि खासदार मुरलीधर मोहोळ यांच्यावर जबाबदारी सोपवण्यात आली आहे. जबाबदारी मिळाल्यानंतर आता मुरलीधर मोहोळ देखील ऍक्टिव्ह मोडमध्ये आले असून शुक्रवारी जिल्ह्यातील नगरपालिका आणि नगरपरिषगद निवडणुकी संदर्भात त्यांनी आढावा बैठक घेतली.

पुणे जिल्ह्यामध्ये 14 नगरपालिका आणि तीन नगरपरिषदा येतात या निवडणुकीची रणनीती ठरवण्याच्या दृष्टिकोनातून स्थानिक आमदार, माजी आमदार, वरिष्ठ नेते आणि पुणे जिल्ह्यातील दोन जिल्हाध्यक्ष समवेत ही बैठक घेण्यात आली.

त्यानंतर आता उद्या सोमवारी या 14 नगरपालिका आणि तीन नगर नगरपरिषदांची निवडणूक लढवण्यासाठी भाजपकडून इच्छुक असणाऱ्या पदाधिकारी आणि कार्यकर्त्यांच्या मुलाखती घेण्यात येणार आहेत. या निवडणुकीच्या दृष्टिकोनातून यापूर्वीच भाजपने इच्छुकांच्या अर्ज मागवले होते. यावेळी हजारोंच्या संख्येने भाजप पदाधिकारी आणि कार्यकर्त्यांनी निवडणूक लढवण्याची इच्छा व्यक्त केली आहे.

आता याच इच्छुकांच्या मुलाखती मुरलीधर मोहोळ यांच्या उपस्थितीमध्ये होणार आहेत. या मुलाखतीला पुणे जिल्ह्यातील दोन जिल्हाध्यक्ष यांच्यासह आमदार राहुल कुल, महेश लांडगे, माजी आमदार संग्राम थोपटे, संजय जगताप यांच्यासह वरिष्ठ नेते उपस्थित असणार आहेत.

या मुलाखतीचे ठिकाण हे पुणे उत्तरसाठी हडपसर परिसरात तर पुणे दक्षिण साठी बाणेर परिसरात नियोजित करण्यात आला आहे. या मुलाखतींच्याच आधारे प्राथमिक टप्प्यांमध्ये उमेदवारांची छाननी करण्यात येणार आहे. पहिल्याच मुलाखतींच्या टप्प्यात शॉर्टलिस्ट केलेले उमेदवार पुढील टप्प्यातील उमेदवारीच्या रेसमध्ये राहणार आहेत. भाजप कडून तीन टप्प्यांमध्ये उमेदवारी निश्चिती करण्यात येणार आहे. यामुळे गेल्या अनेक वर्षांपासून नगरसेवक होण्याची इच्छा मनाची बाळगून असलेल्या भाजप कार्यकर्त्यांसाठी उद्यापासून खरी परीक्षा सुरू होणार आहे.