Bandu Aandekar News: पुणे पोलिसांचा बंडू आंदेकर टोळीला सर्वात मोठा दणका; एक ना दोन तब्बल 27 बँक खाती गोठवली, किती रक्कम आढळली?

Pune News: पुणे शहरात गणेश विसर्जन मिरवणुकीच्या आदल्यादिवशीच आयुष कोमकर या 19 वर्षीय तरुणावर आंदेकर टोळीनं दिवसाढवळ्या 12 गोळ्या झाडत निर्घृण हत्या केली होती. ही हत्या वर्षभरापूर्वी नाना पेठेत झालेल्या वनराज आंदेकर (Vanraj Aandekar) खूनाचा बदला म्हणून करण्यात आल्याचं समोर येत आहे. पोलिसांनी या प्रकरणी पूर्ण आंदेकर कुटुंबासह एकूण 13 जणांसह अटक केली आहे. पुणे पोलिसांनी आता आयुष कोमकर हत्येप्रकरणी सर्वात मोठी कारवाई केली आहे.

नानापेठसारख्या गजबजलेल्या परिसरात भरदिवसा आयुष कोमकर या तरुणाची एकापाठोपाठ एक 12 गोळ्या झाडून हत्या झाल्यानं संपूर्ण पुणे शहर हादरलं होतं. या हत्येप्रकरणी बंडू आंदेकर याच्यावर आरोप केला जात आहे. पोलिसांचा तपासही याचदिशेनं सुरू आहे. आता पुणे पोलिसांनी आंदेकर टोळीला मोठा दणका देतानाच तब्बल 27 बँक खाती गोठवली आहेत.

पुणे पोलिसांनी आता आंदेकर टोळीभोवतीचा कारवाईचा फास आवळतानाच एकामागोमाग एक दणके देण्यास सुरुवात केली आहे. आंदेकर टोळीचा म्होरक्या असलेल्या बंडू उर्फ सूर्यकांत आंदेकर याच्या घराची मध्यंतरी झाडाझडती घेण्यात आली होती. यावेळी पोलिसांना महत्त्वाचे धागेदोरे हाती लागले होते.

तसेच यापूर्वी बंडू आंदेकर (Bandu Aandekar) याच्या घरातून पोलिसांना लाखो रुपयांची रोख रक्कम,सोन्या चांदीचे दागिने यांसह 10 पेक्षा अधिक साठेखत जप्त केले होते. तसेच आता पुणे पोलिसांनी आंदेकर टोळीचे आतापर्यंत 27 खाती गोठवल्यामुळे हा बंडू आंदेकरसाठी मोठा धक्का मानला जात आहे. धक्कादायक बाब म्हणजे आंदेकर टोळीच्या खात्यात 50 लाख रुपयांची रक्कमही आढळली आहे.

पुणे गुन्हे शाखेसह समर्थ पोलिस ठाण्याचे अधिकारी-कर्मचाऱ्यांनी सुमारे 11 तास आंदेकर टोळीतील आरोपींच्या घराची झाडाझडती घेतली. खबरदारी म्हणून आंदेकरने घराच्या शंभर मीटर परिसरात 25 पेक्षा अधिक सीसीटीव्ही कॅमेरे लावल्याची पोलिसांनी दिली.

वर्षभरापूर्वी नाना पेठेत झालेल्या वनराज आंदेकर खूनाचा बदला म्हणून या प्रकरणातील अटकेत असलेल्या आरोपी गणेश कोमकर याचा मुलगा आयुष कोमकर यांच्यावर आंदेकर टोळीनं दिवसाढवळ्या गोळ्या झाडून 'गेम' केला. या प्रकरणात पोलिसांना 13 जणांना अटक केली आहे, आठ जणांवर मकोका अंतर्गत कारवाई करण्यात आली आहे. या प्रकरणात मोठी अपडेट समोर येत आहे.

बंडू आंदेकरच्या घरात काय सापडलं?

1. 770 ग्रॅम सोन्याचे दागिने (आजच्या बाजार भावानुसार 85 लाखांहून अधिक किंमत)

2. 31 हजार रुपयांची चांदी

3. 2 लाख 45 हजारांची रोकड

4. 10 पेक्षा अधिक साठेखत

5. पॉवर ऑफ अॅटर्नी

6. बँकेचे पासबुक

7. एक कार

8. विविध करारनामे

9. टॅक्स पावत्या

10. पेनड्राईव्ह