Pune Traffic News : पुणेकरांना दिलासा! विद्यापीठासमोरील आचार्य आनंदऋषीजी चौकातील वाहतुकीत मोठा बदल; ट्रॅफिकचा ताण कमी होणार

Pune News : पुणे गणेशखिंड रस्त्यावरील आचार्य आनंदऋषीजी चौकातील दुमजली उड्डाणपुलाचे काम पूर्ण झाल्यानंतर या परिसरातील वाहतूक व्यवस्थेत बदल करण्यात आला आहे. पाषाण, बाणेर आणि अभिमानश्री सोसायटी रस्त्यावर लागू करण्यात आलेली एकेरी वाहतूक रद्द करून या मार्गांवर दुहेरी वाहतूक पूर्ववत करण्यात आली आहे.

चतु:शृंगी वाहतूक विभागांतर्गत सावित्रीबाई फुले पुणे विद्यापीठासमोरील परिसरात मेट्रो मार्गिका आणि दुमजली उड्डाणपुलाचे काम सुरू होते. त्यामुळे वाहतूक सुरळीत ठेवण्यासाठी पाषाण रस्ता, बाणेर रस्ता आणि अभिमानश्री सोसायटी परिसरात एकेरी वाहतूक करण्यात आली होती.

या बदलांमुळे वाहनचालकांना पर्यायी मार्गांचा वापर करावा लागत होता. हे काम पूर्ण झाल्याने गणेशखिंड रस्त्यावरील वाहतूक व्यवस्थेत काही प्रमाणात सुधारणा झाली आहे. त्यामुळे वाहतूक पोलिसांनी या मार्गावरील पूर्वीचे निर्बंध हटवले आहेत.

आचार्य आनंदऋषीजी चौक ते अभिमानश्री सोसायटी ते बाणेर रस्त्यावरील वाहतूक पुन्हा दुहेरी केली आहे. पाषाणकडून अभिमानश्री सोसायटीमार्गे आचार्य आनंदऋषीजी चौकापर्यंतची वाहतूकही दोन्ही बाजूंनी सुरू करण्यात आली आहे. याशिवाय अभिमानश्री सोसायटीतून पाषाण आणि बाणेरकडे जाणारा रस्ताही दुहेरी करण्यात आला आहे.

तसेच, बाणेर फाट्याकडून येणाऱ्या आणि अभिमानश्री सोसायटीकडून पाषाणकडे जाणाऱ्या वाहनचालकांनी सकाळनगर परिसरातून उजवीकडे वळून इच्छितस्थळी जावे, असे आवाहन वाहतूक पोलिसांनी केले आहे. त्यामुळे या मार्गावरील दैनंदिन वाहतुकीचा ताण काही प्रमाणात कमी होण्याची अपेक्षा आहे.