Pune Vaishnavi Hagawane : एकापाठोपाठच्या 'या' 4 मोठ्या दणक्यांमुळे राजेंद्र हगवणे अन् दीर सुशीलचे पळण्याचे मार्गच संपले अन् पहाटेच पोलिसांनी मुसक्या आवळल्या

Pune News : पुण्यातील वैष्णवी हगवणे मृत्यू प्रकरणानं संपूर्ण राज्याला हादरवलं आहे. बावधन पोलिसांनी गेल्या सात दिवसांपासून फरार असलेले सासरे राजेंद्र हगवणे आणि त्याचसोबत वैष्णवीचा दीर सुशीललाही अटक केली आहे. शुक्रवारी (ता.23) पहाटे साडेचारच्या सुमाराला या दोघांना पोलिसांनी ताब्यात घेतलं. एकापाठोपाठच्या 4 मोठ्या दणक्यांमुळे राजेंद्र हगवणे अन् दीर सुशीलचे पळण्याचे मार्गच संपले अन् पहाटेच पोलिसांनी मुसक्या आवळल्या.

वैष्णवी हगवणेने (Vaishnavi Hagawane) सासरच्या छळाला कंटाळून शुक्रवारी (16 मे) राहत्या घरात गळफास घेत जीवन संपवलं होतं. वैष्णवीचे वडील आनंद कस्पटे यांनी दिलेल्या फिर्यादीनुसार,नवरा शशांक,नणंद करिश्मा आणि सासू लता हगवणे यांना यापूर्वीच पोलिसांनी अटक केली होती. पण पोलिसांनी लागोपाठच्या कारवायांमुळे राजेंद्र हगवणे आणि शशांक हगवणे यांच्या अडचणी वाढल्या होत्या. त्याचमुळे पोलिसांसाठी अटकेची कारवाई सोपी झाली होती.

वैष्णवीच्या लग्नात 51 तोळे सोने, फॉर्च्यूनर गाडी, चांदीची भांडी देण्यात आली. त्यानंतर लग्नाच्या दुसऱ्या दिवसापासून शशांक व तिचे सासू-सासरे यांनी घरातील किरकोळ कामाच्या वादातून तिच्याबरोबर भांडण सुरू केले होते. तिच्या चारित्र्यावरून बोलणं वैष्णवीला सासऱ्याच्या लोकांनी शारीरिक व मानसिक त्रास देणं चालू केलं होतं. पती,सासू-सासरे,नणंद,दीर यांनी हुंड्यासाठी मानसिक छळ केला होता. धक्कादायक बाब म्हणजे पोस्ट मार्टममध्ये वैष्णवीच्या अंगावर मारहाणीचे व्रण आढळून आले होते.

राजेंद्र हगवणे हा राष्ट्रवादी काँग्रेस अजित पवार गटाचा राज्य कार्यकारिणी सदस्य होता.याचमुळे वैष्णवीच्या प्रकरणात पोलिसांवर कारवाईसाठी राजकीय दबाव असल्याच्या चर्चा होत्या. त्याचबरोबर उपमुख्यमंत्री अजित पवारांचे राजेंद्र हगवणे (Rajendra Hagawane) सोबत जवळचे संबंध असल्याने त्यांना पाठिशी घातल्याच्या चर्चा होत्या. पण अजित पवारांनी गुरुवारी बारामतीत स्पष्टपणे भूमिका घेतली होती.

अजित पवारांनी ही घटना घडल्याची माहिती कळल्यावर पिंपरीच्या सीपींना फोन केला आणि म्हटलं कोणी का असेना कारवाई करा. ज्या मुलीने आत्महत्या केली, तिचा नवरा, सासू, नणंद आतमध्ये आहे. सगळे अटकेत आहेत. सासरा पळून गेला. तो पण सापडेल, पळून पळून जातो कुठं? सीपींना सांगितले, कारवाई झाली पाहिजे.तीन पथकं रवाना केली असेल सात करा पण फरार आरोपींना अटक करा, असंही सांगितलं होतं.

तसेच एखाद्या गरीब कार्यकर्त्याच्या दारात दहावेळा जाईन, पण असली नालायक माणसं माझ्या पक्षात नको. तो जर माझ्या पक्षाचा सभासद असेल तर त्याची राष्ट्रवादी काँग्रेस पक्षातून हकालपट्टी करत असल्याचं जाहीर करत याप्रकरणात हात झटकले होते.यामुळे ज्या राजकीय बळाचा वापर करत राजेंद्र हगवणे पोलिसांवर कारवाई न करण्यासाठी दबाव टाकत होते,तीच कमकुवत ठरल्यामुळे त्यांचे अटकेपासून पळ काढणं शक्यच नव्हतं.

तसेच अंजली दमानिया यांनी वैष्णवी हगवणे हत्याप्रकरणात गुरुवारी(ता.22)ट्विट करत मोठी खळबळ उडवून दिली होती.यावेळी त्यांनी थेट पोलिस महानिरीक्षक दर्जाच्या वैष्णवीचा नवरा शशांकचे मामा असलेल्या जालिंदर सुपेकर यांचंच नाव घेतलं होतं.हगवणे कुटुंब याच मामाचा धाक दाखवून वैष्णवी आणि मयुरी या दोन्ही सुनांचा छळ केल्याची माहिती आपल्याला मिळाल्याचं म्हटलं होतं. त्यांनी सुपेकर यांच्यावर 500 कोटींचा घोटाळ्याचाही उल्लेख केला होता.

यानंतर मात्र,वरिष्ठ पोलिस अधिकारी सुपेकर यांनी एका मराठी वृत्तवाहिनीशी बोलताना हगवणे कुटुंबीय हे आपले दूरचे नातेवाईक असून,त्यांच्याशी संबंधित प्रकरणात कोणताही संबंध नसल्याचं त्यांनी स्पष्ट केलं होतं. तसेच हगवणे कुटुंबासोबत गेल्या कित्येक महिन्यांपासून संवाद नसल्याचंही म्हटलं.

याचवेळी त्यांनी आपल्यालाही दोन मुली असून,अशा गंभीर व निर्घृण कृत्याचं समर्थन कुठलाही बाप करू शकत नसल्याचं सांगितलं आहे. याचवेळी त्यांनी दोषींना त्यांच्या कृत्याची शिक्षा मिळायलाच पाहिजे अशी कठोर भूमिका घेतली होती.यामुळे ज्यांच्या जीवावर हगवणे कुटुंब टुरटुर करत होते, त्यांनीच विरोधात भूमिका घेतल्यामुळे मोठी पंचाईत झाली.

तसेच बावधन पोलिसांनी गुरुवारी(ता.22)दुपारी वैष्णवी हगवणे मृत्यू प्रकरणात तिचे सासरे राजेंद्र हगवणे यांच्या जवळच्या मित्राला चौकशीसाठी ताब्यात घेतलं होतं. सुनील चांदेरे असं त्यांचं नाव असून गेल्या एक तासाहून अधिक वेळ त्यांची चौकशी झाली होती. चांदेरे हे पुणे जिल्हा सहकारी बँकेचे उपाध्यक्ष आहेत.

यानंतर वारजे पोलिसांनी रात्री उशिरा वैष्णवीचा ताबा न देता बंदुकीचा धाक दाखवून कस्पटे कुटुंबियांवर दादागिरी करणाऱ्या निलेश चव्हाणलाही दणका दिला होता. त्याच्याविरोधात गुन्हा दाखल झाल्यामुळे राजेंद्र हगवणे आणि दीर सुशील हगवणेबाबतची मोठी माहिती पोलिसांना मिळणार होती. यामुळे हगवणे सासरे दीर यांच्यासमोरचे पळण्याचे पर्याय संपल्यातच जमा झाले होते.

राजेंद्र हगवणे हे तळेगाव येथील एका हॉटेलच्या सीसीटीव्हीमध्ये गुरुवारी कैद झाले. ही घटना पिंपरी चिंचवड पोलिसांना समजताच पोलिसांनी त्यांना ताब्यात घेतले आहे. परंतु या घटनेची अधिकृत माहिती अद्यापही पोलिसांनी दिलेली नाही. या दोघांच्या अटकेसाठी पोलिसांनी सहा पथके तयार केली होती. याबाबत गृहराज्यमंत्री योगेश कदम यांनी ‘दोघे कुठल्याही बिळात लपलेले असले तरी आम्ही त्यांना शोधून काढू,’ असा इशारा दिला होता.