Sushma Andhare : चाकणकरांच्या गँगकडून गलिच्छ पद्धतीने फोटो मॉर्फ करून महिला नेत्यांची बदनामी! अजितदादा दखल घेणार?

Pune News : वैष्णवी हगवणे मृत्यू प्रकरणाच्या अनुषंगाने महिला आयोगाच्या अध्यक्ष रूपाली चाकणकर यांच्यावर चौफेर टीका होत असल्याचं पाहायला मिळत आहे. विरोधातील महिला नेत्यांनी चाकणकरांविरोधात आघाडी उघडली असल्याचे पाहायला मिळत आहेत. अशातच आता चाकणकर यांच्या समर्थकांकडून फोनवरून धमक्या तसेच फोटो मॉर्फ करून बदनामी केली जात असल्याचा आरोप करण्यात येत आहे.

शिवसेना उद्धव बाळासाहेब ठाकरे पक्षाच्या नेत्या सुषमा अंधारे यांनी याबाबत आरोप केले आहेत. तसेच राज्याचे उपमुख्यमंत्री आणि राष्ट्रवादी काँग्रेसचे राष्ट्रीय अध्यक्ष अजित पवारांना याबाबत एक पत्र लिहिलं आहे. या पत्रामध्ये सुषमा अंधारे यांनी महिला आयोगाच्या अध्यक्ष रूपाली चाकणकर यांच्याबाबत गंभीर आरोप केले आहेत. हे पत्र सुषमा अंधारे यांनी सोशल मीडियात पोस्ट केले आहे.

या पत्रामध्ये सुषमा अंधारेंनी म्हटले आहे की, रूपाली चाकणकर यांच्या समर्थक गँगकडून अनेक बायकांना धमक्यांचे आणि अश्लील शिवीगाळीचे फोन सुरू झालेले आहेत. त्यातल्या काही कॉल रेकॉर्डिंग सकाळी राष्ट्रवादी काँग्रेस शरदचंद्र पवार पक्षाच्या प्रदेशाध्यक्ष रोहिणी खडसे यांनी एक्स या प्लॅटफॉर्म वरती पोस्ट केल्या आहेत.

आता रूपाली चाकणकरांच्या गँगकडून गलिच्छ पद्धतीने फोटो मॉर्फ करून, माझे, रोहिणी खडसे, काँग्रेसच्या नेत्या यशोमती ठाकूर, वर्षा गायकवाड, यांच्याबाबत अत्यंत वाईट भाषेमध्ये टिप्पणी करण्यात येत असल्याचे अंधारे यांनी पत्रात म्हटले आहे.

मला चाकणकरांना काहीही बोलायचं नाही. पण राज्याचे उपमुख्यमंत्री असणारे सन्माननीय अजितदादा यांना मात्र नम्रपणे प्रश्न विचारायचा आहे, की "दादा आपण ज्यांना विश्वासाने महिलांच्या सन्मानासाठी आणि संरक्षणासाठी महिला आयोगाच्या अध्यक्षपदावर रूपाली चाकणकर यांना बसवलेले आहे. जर त्या हक्काने वैष्णवी हगवणे प्रकरणात प्रश्न विचारला म्हणून चाकणकर यांच्या ब्लॅकमेलर गँग मार्फत इतक्या गलिच्छ पद्धतीने आमच्यावर टिप्पणी करत असतील तर आम्ही न्याय आता कुणाकडे मागायचा?, असा सवाल या पत्रातून सुषमा अंधारे यांनी अजित पवार यांना केला आहे.