Daund Firing : दौंड कला केंद्रातील गोळीबार प्रकरणात ट्विस्ट, आमदाराच्या भावाकडे लायसन्स नाही मग ती बंदूक कोणाची?

Daund Firing News : दौंड तालुक्यातील वखारी येथील न्यू अंबिका कला केंद्रात गोळीबाराची घटना सोमवारी रात्री घडली होती. या गोळीबारामध्ये मुळशीचे आमदार शंकर मांडेकर यांचा लहान भाऊ बाळासाहेब मांडेकर याचा सहभाग असल्याचे पुढे आल्याने एकच खळबळ उडाली होती. स्वतः शंकर मांडेकर यांनी पुढे येत या प्रकरणावर स्पष्टीकरण दिले होते. आपल्या भावाकडे बंदुकीचे लायसन्स नाही तसेच त्याच्याकडे बंदुकही नाही, असे मांडेकर म्हणाले होते.

बाळासाहेब मांडेकर यांच्याकडे बंदूक नव्हती मग कला केंद्रात गोळीबार कोणाच्या बंदूकीतून करण्यात आला? असा प्रश्न विचारला जात होता. याचे उत्तर देखील आमदार शंकर मांडेकर यांनीच दिले आहे. ते म्हणाले, माझ्या भावाकडे बंदूक नसली तरी त्याच्यासोबत जो जगताप नावाचा व्यक्ती होता त्याच्याकडे बंदूक आहे.

पोलिसांनी गोळीबार प्रकरणात गुन्हा दाखल केला आहे त्यात बाळासाहेब मांडेकर यांच्यासोबत गणपत जाधव, चंद्रकांत मारणे यांना आरोपी केले आहे. त्यामुळे गणपत जाधव याच्याकडे असलेल्या बंदूकीतून गोळीबार केला गेला असल्याचा अंदाज आहे. दरम्यान, हा गोळीबार स्वतः गणपत जाधव याने केली की बाळासाहेब मांडेकर याने केला हे पोलिस तपासात समोर येईल.

महिलेला गोळी लागली नाही...

गोळीबाराच्या घटनेनंतर कला केंद्रातील महिलेला गोळी लागल्याचे सांगितले जात होते. मात्र, स्वतः उपमुख्यमंत्री अजित पवार यांनी माध्यमांशी संवाद साधताना गोळीबार हा हवेत करण्यात आला होता. महिलेला गोळी लागली नसल्याचे सांगितले. याबाबात आपण ग्रामीणचे पोलिस एसपींशी संवाद साधला होता, असे देखील अजित पवार म्हणाले.

माझा भाऊ समाजसेवक

आमदार शंकर मांडेकर यांनी माध्यमांशी बोलताना सांगिले की, माझा भाऊ समाजकार्य करतो, शेती पाहतो, वारकरी संप्रदायाच काम करतो.किर्तनात देखील असतो तो कला केंद्रावर कसा गेला हे खूपच शाॅकिंग आहे. चार भाऊ असतात त्यातला एक चोर असतो, एक देव असतो. चुकीचं प्रायश्चित्त शासन त्याला देईल. या प्रकरणात कुठलाही दबाव आणला नसल्याचे देखील मांडेकर यांनी सांगितले.