Sharad Pawar: ‘छाती फाडली तरी साहेबच दिसतील’… पवारांनी भाजपचं कमळ असलेलं पत्रक दाखवताच पुढे काय घडलं?

Sharad Pawar drought visit: राष्ट्रवादी का्ॅग्रेस शरदचंद्र पक्षाचे अध्यक्ष शरद पवार हे सध्या महाराष्ट्राच्या दुष्काळाची पाहणी करण्यासाठी राज्यात फिरत आहेत. वयाच्या 86 व्या वर्षी शेताच्या बांधावर जाऊन शेतकऱ्यांच्या व्यथा ते ऐकत आहेत. गावागावांत जाऊन ते शेतकऱ्यांशी संवाद साधत असून, पाणी, चारा, पिके आणि शेतीच्या अडचणींची माहिती घेत आहेत. बारामती तालुक्यातील जवळार्जुन येथेही असाच शेतकरी संवाद सुरू असताना एक मिश्कील किस्सा घडला आणि काही क्षणांसाठी गंभीर वातावरणात एकच हशा पिकला.

जवळार्जुन येथे शरद पवार शेतकऱ्यांच्या समस्या ऐकून घेत होते. अनेक शेतकऱ्यांनी दुष्काळाची परिस्थिती, पाण्याची अडचण, चाऱ्याचा प्रश्न तसेच वैयक्तिक समस्या पवारांसमोर मांडल्या. पवारही प्रत्येकाची बाजू शांतपणे ऐकून घेत होते. याचवेळी एका शेतकऱ्याने आपल्या कुटुंबाची पवारांवरील निष्ठा सांगताना जुन्या आठवणींना उजाळा दिला.

‘माझे वडील तुमच्या कृपेने आमदार झाले...’

हा शेतकरी म्हणाला, ‘माझे वडील म्हणजे अशोकभाऊ. तुमच्या कृपेने ते आमदार झाले. ते आम्हाला बारामतीला घेऊन यायचे. माझे वडील नेहमी म्हणायचे की, छाती फाडली तरी त्यामध्ये साहेबच दिसतील.’

शेतकऱ्याने पवारांबद्दल व्यक्त केलेल्या या भावना ऐकून उपस्थितांनी टाळ्यांचा कडकडाट केला. मात्र, शेतकऱ्याचे कौतुक सुरू असतानाच पवारांनी त्याच्याकडील एक पत्र हातात घेतले आणि ते उपस्थितांना दाखवले.

‘मग हे काय आहे?’

या पत्रावर भाजपचे कमळ चिन्ह आणि भाजपचे लेटरहेड असल्याचे दिसत होते. पवारांनी ते पत्र उंचावत त्या शेतकऱ्याकडे पाहत मिश्कीलपणे विचारले, ‘मग हे काय आहे?’

पवारांचा हा अनपेक्षित सवाल ऐकताच उपस्थितांमध्ये एकच हशा पिकला. काही क्षणांपूर्वी ‘छाती फाडली तरी साहेबच दिसतील’ असे सांगणाऱ्या शेतकऱ्याला पवारांनी त्याच्याच भाजपच्या लेटरहेडकडे लक्ष वेधून दिल्याने हा किस्सा चर्चेचा विषय ठरला.

दुष्काळी भागासाठी पाण्याच्या योजनांचा आधार

दरम्यान, शेतकरी संवादात शरद पवारांनी बारामती तालुक्यातील जिरायती भागातील सिंचनाच्या प्रश्नावरही भाष्य केले. जिरायती भागातील शेतकऱ्यांना पाण्याचा आधार मिळावा यासाठी पुरंदर उपसा सिंचन योजना आणि जानाई-शिरसाई सिंचन योजना राबविण्यात आल्या. या योजनांमुळे अनेक गावांमध्ये पाणी पोहोचले असून, शेतीला मोठा आधार मिळाला आहे.

पुरंदर उपसा सिंचन योजनेचे पाणी मोरगावसह परिसरातील गावांमध्ये पोहोचल्याने अनेक शेतकऱ्यांना ऊसासारखी पिके घेणे शक्य झाले. मात्र, बारामती तालुक्यातील जिरायती भागातील शंभर टक्के क्षेत्र अद्याप बागायत करता आलेले नाही, याची खंत असल्याचे पवारांनी सांगितले.