Sharad Pawar Party leader allegations : बीडमधील गुन्हेगारीचा पॅटर्न तीन स्तंभांवर आधारलेला; शरदचंद्र पवार पक्षाच्या नेत्याचे गंभीर आरोप

Pune News : मस्साजोगचे संतोष देशमुख यांच्या हत्या प्रकरणानंतर बीडमधील गुन्हेगारी बाबतच्या चर्चा सातत्याने संपूर्ण महाराष्ट्रभर सुरू आहेत. बीडचा गुन्हेगारीशी संबंध जोडला जात असल्याने बीडमधील नागरिकांकडून सातत्याने याबाबत रोष व्यक्त करण्यात येत आहे. याच पार्श्वभूमीवर राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी बीडच्या गुन्हेगारीबाबत वक्तव्य केले आहे.

गेल्या काही दिवसांपासून बीडमधील वाढत्या गुन्हेगारीचा मुद्दा ऐरणीवर आला आहे. बीड जिल्ह्यातच अधिकृत शस्त्र प्रमाणे मोठ्या प्रमाणात देण्यात आल्याचा देखील याच दरम्यान प्रकाश झोतात आले आहे. यानंतर पोलीस प्रशासनाने जागे होत ज्यांच्या वर गंभीर गुन्हे आहेत, अशा अनेक मंडळींचे शस्त्र परवाने रद्द करण्यास सुरुवात केली आहे. तसेच गुन्हेगारीची पाळेमुळे खोदण्यासही पोलीस सरसावले आहेत.

एकीकडे प्रशासन गुन्हेगारीवरती नियंत्रण आणण्याचा प्रयत्न करत असतानाच दुसरीकडे मात्र बीडच्या गुन्हेगारींवरून सातत्याने राजकीय टीकाटिपणी होताना पाहायला मिळत आहे. अशातच शरद पवारांच्या (Sharad Pawar) राष्ट्रवादीचे नेते आणि आमदार रोहित पवार यांनी बीडच्या गुन्हेगारीबाबत एक सोशल मीडियावर पोस्ट केली आहे.

रोहित पवार (Rohit Pawar) म्हणाले, 'बीड प्रकरणात उशिरा का होईना सरकारने अखेर न्यायालयीन समिती नेमली व समितीत चांगल्या पद्धतीने काम करणाऱ्या माजी न्यायमूर्ती एम. एल. तहलियानी यांची नेमणुक केल्याबद्दल सरकारचे आभार. बीडमधील गुन्हेगारीचा पॅटर्न हा राजकीय आश्रय, मर्जीतले प्रशासन आणि गुंड अशा तीन स्तंभांवर आधारलेला असून अत्यंत घातक आहे, या पॅटर्नमध्ये लोकांना धमकावून किंवा प्रशासनाला हाताशी धरून खोटे गुन्हे दाखल करून कराडची टोळी हवे ते मग ते काहीही असो, असे सर्व प्राप्त करून घेते. सहा सात महिन्यांपूर्वी याच पद्धतीने कराड टोळीने बबन गीतेंना सुद्धा अडकवले होते. तपास केला तर अशा असंख्य घटना समोर येतील.

न्यायालयीन समिती खोलात जाऊन पारदर्शक तपास करून गुंडगिरीचा हा पॅटर्न मोडून काढेल, ही अपेक्षा आणि संघर्षाची कष्टकऱ्यांची भूमी असलेला तसेच मोठा वैचारिक वारसा लाभलेला बीड जिल्हा गुंडगिरीच्या ग्रहणातून मुक्त होईल, हा विश्वास आहे, असे रोहित पवार म्हणाले.