Ravindra Dhangekar : धंगेकरांचा अमित शहांविषयीचा 'तो' शब्द उदय सामंताना खटकला; तातडीने फोन करून विचारला जाब

Pune News : गेल्या काही दिवसांपासून उपमुख्यमंत्री एकनाथ शिंदे यांच्या शिवसेनेचे पुणे महानगर प्रमुख रवींद्र धंगेकर हे भाजप नेत्यांवर सडकून टीका करताना पाहायला मिळत आहेत. यानंतर भाजपनेत्यांनी धंगेकरांच्या वक्तव्यांमुळे महायुतीमध्ये मिठाचा खडा पडत असल्याचे एकनाथ शिंदे यांच्या कानावर घातलं आहे. त्यानंतर एकनाथ शिंदे यांनी देखील धंगेकर यांना महायुतीमध्ये दंगा नको असा सूचना दिल्या. एकनाथ शिंदे यांच्या सूचनेनंतर देखील धंगेकर हे सातत्याने भाजप नेत्यांवर टीका करत असल्याचे पाहायला मिळत आहेत.

अशातच आज गृहमंत्री अमित शाह हे मुंबई दौऱ्यावर असताना रवींद्र धंगेकर यांनी जैन बोर्डिंग होस्टेल प्रकरणांमध्ये माध्यमांशी बोलताना मी अमित शहा यांना भीक घालत नाही असं वक्तव्य केल्याबाबतची बातमी एका माध्यमांनी चालवली.

अमित शाह मुंबई दौऱ्यावर असताना अशा प्रकारे अमित शाह यांच्याबाबत शिवसेनेच्या नेत्यांकडून वक्तव्य गेल्याने त्याचे गंभीर परिणाम होऊ शकतात याची शक्यता लक्षात घेता मंत्री उदय सामंत यांनी याबाबत तातडीने हस्तक्षेप करत धंगेकर यांना फोन लावला आणि विचारलं अहो धंगेकर तुम्ही नेमकं काय बोलताय?

यावर धंगेकर यांनी देखील आपल्या वक्तव्याचा विपर्यास करण्यात आला असल्याचं सांगितलं आपण आम्ही शाह यांच्या बाबत कोणतीही टीका केली नसून मी कोणत्याही आमिशांना भीक घालत नाही असं वक्तव्य केलं असल्याच स्पष्टीकरण धंगेकर यांनी दिल.

याबाबत माध्यमांशी बोलताना धंगेकर म्हणाले, मला उदय सामंत यांचा फोन आला होता कुठल्यातरी एका चैनलने माझ्या वक्तव्याची मोडतोड करून मी अमित शहांबद्दल चुकीचं बोललो असं दाखवलं. मी आम्ही शाह यांच्याबाबत कधीही चुकीच्या पद्धतीने बोललेलो नाही. याबाबतच्या पोस्टमध्ये ज्या चॅनलचं नाव दिसत आहे. त्यांनी याबाबत खुलासा करावा अथवा फौजदारी कारवाई करावी. मी उदय सामंत यांना सांगितला आहे की मी अशा प्रकारचं कोणतेही वक्तव्य केलं नाही आणि करणार देखील नाही. जे माझ्या तोंडात घालण्याचा प्रयत्न करण्यात आलाय ते चुकीच आहे, असं धंगेकर म्हणले.