Pune News : शिवसेना पक्ष आणि चिन्ह कोणाचं याबाबत सुप्रीम कोर्टामध्ये सुरू असलेली केस आता अंतिम टप्प्यात आली आहे. लवकरच याबाबतचा निर्णय लागणार असून त्यानंतर राज्यातील राजकीय परिस्थिती बदलणार आहे, असा विश्वास शिवसेना उद्धव बाळासाहेब ठाकरे पक्षाचे वकील असीम सरोदे यांनी व्यक्त केला आहे.
पुण्यामध्ये माध्यमांशी बोलताना असीम सरोदे म्हणाले, आत्तापर्यंत सुप्रीम कोर्टामध्ये पक्ष चिन्हासाठी वेगळी आणि अपात्रतेबाबत वेगळी सुनावणी होत होती. मात्र आता सुप्रीम कोर्टाने हे मान्य केले आहे की, या दोन्ही प्रकरणाची सुनावणी एकत्रित व्हायला हवी. त्यामुळे या दोन्ही प्रकरणांवरील याचिकांवर एकत्रित सुनावणी होणार आहे.
यापूर्वी सुप्रीम कोर्टाने दिलेल्या निर्णयानुसार एकनाथ शिंदे यांना चुकीचं ठरवण्यात आलं होतं. मात्र घटनेतील तरतुदी प्रमाणे अपात्रतेबाबत निर्णय हा विधानसभा अध्यक्ष म्हणजेच राहुल नार्वेकर यांनी घेणे अपेक्षित असल्याने न्यायालयाने त्याबाबतचा निर्णय घेण्यासाठी हे प्रकरण राहुल नार्वेकर यांच्याकडे पाठवलं होतं, असे सरोदेंनी सांगितलं.
संविधानिक विश्वासार्हतेला तडा देणारा निकाल राहुल नार्वेकर यांनी दिला. कुणालाही त्यांनी अपात्र केलं नाही. तसेच हा निर्णय घेताना त्यांनी हे प्रकरण पक्षांतर करण्याचा नसून पक्षांतर्गत वादाचा असल्याचे सांगितलं. मात्र विधानसभा अध्यक्षांना पक्षांतर बंदीचे प्रकरण असेल तरच त्याबाबतचा निर्णय घेण्याचा अधिकार आहे, असं असताना देखील पक्षांतर्गत वादाचा मुद्दा असल्याचे सांगत त्यांनी याबाबत निर्णय घेतला आहे. त्यामुळे घडलेला प्रकार संपूर्ण असंविधानिक असल्याचं असीम सरोदे म्हणाले.
सरोदे पुढे म्हणाले, पूर्वी अशा प्रकारचे जेव्हा जेव्हा वाद झाले तेव्हा पक्ष चिन्ह गोठविण्यात आलं होतं. मात्र या प्रकरणांमध्ये पक्षचिन्ह हे एकनाथ शिंदे यांना बहाल करण्यात आलं. त्यामुळे केंद्रीय निवडणूक आयोग हे कोणाच्या हातातलं बाहुलं झाले का? असा प्रश्न निर्माण होत आहे. शिवसेना हे नावच नाही तर पक्षचिन्ह देखील एकनाथ शिंदे यांना बहाल करण्यात आलं. या सर्व गोष्टींवर आता एकत्रित निकाल लागणार आहे.
कायद्याचे हात आता एकनाथ शिंदे यांच्यापर्यंत पोहोचले आहेत. आता त्यांची असंविधानिकता उघड होणार आहे. त्यामुळे आता या महिन्याच्या अखेरपर्यंत निकाल लागण्याची शक्यता आहे. तसं झाल्यास महाराष्ट्रातील संपूर्ण राजकीय परिस्थिती बदलणार असल्याचं असीम सरोदे यांनी स्पष्ट केले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.