Hagwane Family : सुनांचा छळ अन् पोलिसांची फसवणूक करणाऱ्या हगवणे कुटुंबाचा आणखी एक कारनामा उघडकीस, पुतण्याच्या चित्रपटासाठी थेट दिग्दर्शकाला...

Pune News, 31 May : वैष्णवी हगवणे आत्महत्या प्रकरणी पोलिसांनी हगवणे कुटुंबातील पाच जणांना अटक केली आहे. यापैकी वैष्णवीचा सासरा राजेंद्र हगवणे आणि दीर सध्या पोलिस कोठडीत आहेत. तर सासू, नणंद आणि पती न्यायालयीन कोठडीत आहेत.

वैष्णवीच्या आत्महत्येचा तपास पोलिसांकडून सुरू झाल्यापासून हगवणे कुटुंबीयांचे अनेक धक्कादायक कारनामे उघडकीस येत आहेत. आधी घरातील दोन्ही सुनांचा छळ करणे, त्यानंतर पैशांसाठी त्यांना मारहाण केल्याचं समोर आलं आहे.

त्याशिवाय पोलिसांना चुकीचा पत्ता देऊन बंदूक परवाना मिळवणे, असले उद्योग हगवणे पिता-पुत्रांनी केल्याचं समोर आलं आहे. अशातच आता पिता-पुत्रांनी चित्रपट क्षेत्रातही पैसा लावल्याची माहिती समोर आली असून इथेही त्यांनी दिग्दर्शकाचे लाखो रुपये थकवल्याचं उघडकीस आलं आहे.

मिळालेल्या माहितीनुसार राजेंद्र हगवणेचा पुतण्या संतोष हगवणे याने खुर्ची नावाच्या मराठी चित्रपटाची निर्मिती केली आहे. या चित्रपटाचे दिग्दर्शक अविनाश खोचरे पाटलांनी हगवणे यांनी आपले लाखो रुपये थकवल्याचा आरोप केला आहे. महत्वाची बाब म्हणजे या चित्रपटाचे पोस्टर उपमुख्यमंत्री अजित पवारांच्या हस्ते लॉन्च करण्यात आले होते.

चित्रपट दिग्दर्शक खोचरे पाटील यांनी हगवणे यांच्याकडून आपल्याला सातत्याने धमक्या येत होत्या असं सांगितलं. शिवाय याबाबत त्यांनी मुख्यमंत्री आणि उपमुख्यमंत्र्यासह पुणे पोलीस आयुक्त कार्यालयाकडेही लेखी तक्रार केली होती. तरीही हगवणेंवर कोणतीही कारवाई झाली नसल्याचं आता समोर आलं आहे.

धक्कादायक बाब म्हणजे या दिग्दर्शकांना देखील हगवणे यांनी आपले मामा जालिंदर सुपेकर यांच्या नावाची भिती दाखवत दम दिल्याचं समोर आलं आहे. तर आता भाच्यामुळे मामाच्या अडचणीत वाढ झाली असून शशांक हगवणेचे मामा जालिंदर सुपेकर यांची विषेश पोलीस महानिरिक्षक कारागृह पदावनती करुन उप महासमादेशक होमगार्ड या पदावर नियुक्ती करण्यात आली आहे.