Vasant More On Election : वसंत मोरेंना वेगळाच संशय, म्हणाले, 'निवडणूक आल्या की कोरोना...'

Pune News : राज्यात अनेक दिवसांपासून रखडलेल्या स्थानिक स्वराज्य संस्थांच्या निवडणुका पुन्हा एकदा लांबणीवर पडण्याची शक्यता व्यक्त केली जात आहे. गेल्या काही दिवसांपासून राज्यात करोना रुग्णांची संख्या वाढत आहे. या पार्श्वभूमीवर निवडणूक आयोग निवडणुका पुढे ढकलण्याचा विचार करू शकतो असं काही नेत्यांना वाटत आहे. या बाबत शिवसेना उद्धव बाळासाहेब ठाकरे पक्षाचे नेते वसंत मोरे यांनी कोरोना आणि निवडणुकांबाबत एक वेगळाच संशय व्यक्त केला आहे.

वसंत मोरे म्हणाले, 'मला तर ना आता या कोरोनावरतीच संशय येऊ लागला आहे.कारण जेव्हा जेव्हा आपल्या महाराष्ट्रात स्थानिक स्वराज्य संस्थांच्या (महानगरपालिकेच्या) निवडणुकांची चर्चा चालू होते तेव्हा तेव्हा हा म्हणजेच कोरोना कुठून तरी बाहेर निघतो आणि मग निवडणूक आयोग म्हणतो आम्ही निवडणुका घेण्यास समर्थ नाही आणि निवडणुका पुढे जातात.'

राज्यातील अनेक महापालिका, नगरपरिषदा आणि जिल्हा परिषद पंचायत समिती निवडणुका गेल्या तीन ते चार वर्षांपासून प्रलंबित आहेत. काही ठिकाणी तर स्थानिक स्वराज्य संस्थांचा कार्यकाळ संपून 4 वर्षाहून अधिक काळ लोटला आहे. तिथे प्रशासकाद्वारे कामकाज चालू आहे.

या पार्श्वभूमीवर सुप्रीम कोर्टाने आता या निवडणुका पुढील चार महिन्यांमध्ये घेण्याच्या सूचना निवडणूक आयोगाला दिल्या आहेत. तसेच निवडणूक कार्यक्रम तयार करून तो सादर देखील करण्यास सांगितला आहे. सुप्रीम कोर्टाच्या सूचना आल्याने कार्यकर्त्यांमध्ये उत्साह असून एक प्रकारे स्थानिक स्वराज्य संस्थांच्या निवडणुकांचे बिगुल वाजले असल्याचे बोलले जात आहे.

निवडणुका वेळेतच होणार...

राज्याचे मुख्यमंत्री देवेंद्र फडणवीस यांनी देखील सुप्रीम कोर्टाच्या आदेशानुसार वेळेत निवडणुका आम्ही घेणार आहोत असं स्पष्ट केला आहे. तसंच काही ठिकाणी पावसाची शक्यता असल्यामुळे निवडणुका लांबू शकतात असे देखील फडणवीस यांनी सांगितला आहे. मात्र आम्ही वेळेत निवडणुका घेण्यासाठी प्रयत्नशील असल्याचं फडणवीस यांनी स्पष्ट केल आहे.