Laxman Hake On Jarange : आम्ही बाळासाहेब भवनात गेलो म्हणून जरांगेंच्या पोटात का दुखतं? : लक्ष्मण हाकेंचा सवाल

Pune, 06 August : मनोज जरांगे पाटील यांनी कुणबी प्रमाणपत्र रद्द करण्याच्या मुद्यावरून पुन्हा एकदा सरकारला विशेषतः मुख्यमंत्री देवेंद्र फडणवीस आणि महसूल मंत्री चंद्रशेखर बावनकुळे यांना लक्ष्य केले आहे. या दोन नेत्यांवर टीका करतानाच जरांगे पाटील यांनी प्रथमच उपमुख्यमंत्री एकनाथ शिंदे यांच्यावर हल्लाबोल केला आहे. तुमच्या बाळासाहेब भवनात ओबीसीचे नेते कसे येतात, असा सवाल केला आहे. त्याला ओबीसी नेते लक्ष्मण हाके यांनीही जोरदार उत्तर दिले आहे.

प्रा. लक्ष्मण हाके म्हणाले, मनोज जरांगे पाटील हे सरकारच्या हातचे बाहुले बनले आहेत. आजच्या पत्रकार परिषदेत मनोज जरांगे हे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यावरच भडकले आहेत. ‘आम्ही खासदार संदीपान भुमरे, संजय शिरसाट यांना निवडून आणलं’ असं म्हणणं म्हणजे आरक्षणासाठी नव्हे, पक्षासाठी काम केल्याची कबुली आहे.

ज्यांचे जात प्रमाणपत्र रद्द झाले आहे, त्यांच्यावर न बोलता नेत्यांची बाजू घेतली जात आहे. मनोज जरांगे यांनी कास्ट व्हेरिफिकेशन समितीवर टीका करणे अयोग्य आहे. आम्ही बाळासाहेब भवनात गेलो; म्हणून मनोज जरांगेंच्या पोटात का दुखतं? ते त्यांच्या वडिलांचं कार्यालय आहे का? असा सवाल ओबीसी नेते ॲड लक्ष्मण हाके यांनी केला आहे.

ज्या एकनाथ शिंदे यांनी मनोज जरांगे पाटील यांचं कौतुक केले. जे शिंदे मराठ्यांचं राजकारण करतात, त्यांच्याकडे तुम्ही कशाला जाता, असा सवाल करताच उद्यापासून जाणार नाही. लक्ष्मण हाके हा ओबीसीचा प्रवक्ता आहे. पहिल्या दिवसापासून आम्ही हे बेकायदा आहोत, असे सांगत आहोत. आम्ही कोणाला भेटावं, बोलावं, याबाबत अजून तरी आमच्यावर कोणी मर्यादा घातलेली नाही. आम्ही लोकशाही राज्यात राहणारी माणसं आहोत, असे हाके यांनी स्पष्ट केले.

आम्ही उपमुख्यमंत्री एकनाथ शिंदे यांना सांभाळून घेतलं, पण आजची त्यांची भूमिका चुकीची वाटली. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी आरक्षणाबाबत स्पष्ट भूमिका जाहीर करावी. आम्हाला कोणी मोजलं नाही; म्हणून आमचं आंदोलन थांबणार नाही. आरक्षणाच्या नावाखाली राजकारण करणाऱ्यांचा पर्दाफाश झाला आहे, असा दावा ॲड लक्ष्मण हाके यांनी केला आहे.