Maharashtra Politic's : आव्हाडांनी शिंदेंचे कौतुक केले; पण अजितदादांनी ‘ती’ चूक लक्षात आणून देत चिमटा काढला

Mumbai, 17 July : उपमुख्यमंत्री एकनाथ शिंदे यांनी आज (ता. 17 जुलै) विरोधकांच्या 293 च्या प्रस्तावाला उत्तर दिले. त्यात जितेंद्र आव्हाड यांच्या फायलींवर मी सह्या करायचो, असे सांगितले. त्यानंतर आमदार जितेंद्र आव्हाड यांनी ‘एकनाथ शिंदे यांनी माझ्या एका फायलीवर रात्री साडेतीन वाजता सही केली,’ असे सांगून शिंदेंच्या कामाचे कौतुक केले. यात उपमुख्यमंत्री अजित पवार यांनी ‘अध्यक्ष महोदय, रात्री साडेतीन म्हणत नाहीत, पहाटे साडेतीन म्हणतात,’ असे सांगून आव्हाडांना चिमटा काढला, त्यामुळे सभागृहात एकच हशा पिकला.

जितेंद्र आव्हाड (Jitendra Awhad) आले आता. ते मंत्री होते. मी नगरविकास मंत्री होते. ते माझ्याकडे फाईल घेऊन यायचे. तेव्हा मी ताबडतोब सही करायचो की नाही. (तेवढ्यात एकनाथ शिंदेंच्या पाठीमागे बसलेले परिवहन मंत्री प्रताप सरनाईक यांनी उभ्या उभ्या सही करायचे असे ॲडिशन केले) उभ्या उभ्या सही करायचो की नाही. त्याला आमदार जितेंद्र आव्हाड यांनी ‘माझे नाव घेतले अध्यक्ष महोदय’ म्हणत आक्षेप घेतला. मात्र, एकनाथ शिंदे यांनी ते पॉझिटिव्ह अर्थाने घेतले आहे, असे स्पष्ट केले. तसेच विधानसभा अध्यक्ष राहुल नार्वेकर यांनीही ‘तुमची स्तुती केली आव्हाडसाहेब,’ असे समाजवून सांगितले.

दरम्यान, त्याचवेळी मंत्री प्रताप सरनाईक यांनी पुन्हा एकदा संधी साधत जितेंद्र आव्हाड यांना टोमणा लगावला. ‘केवळ तेव्हाच नाही तर आताही उपमुख्यमंत्री एकनाथ शिंदे (Eknath Shinde) हे आमदार जितेंद्र आव्हाड यांच्या फायलींवर सही करतात. अजूनही मदत करण्याचे चालू आहे,’ असे सरनाईक यांनी स्पष्ट केले.

त्याचवेळी आव्हाड यांनी ‘एक सही या माणसाने रात्री साडेतीन वाजता केली’ असे सांगून एकनाथ शिंदे यांच्या कामाचे कौतुक केले. तब्यतेची काळजी घेतली. पण साडेतीन ही काही सही करण्याची वेळ नाही. पण, मी एकनाथ शिंदे यांनी माझ्या एका फाईलवर रात्री साडेतीन वाजता सही केली, असेही आमदार जितेंद्र आव्हाड यांनी स्पष्ट केले.

आमदार जितेंद्र आव्हाड यांनी एकनाथ शिंदेंचे केलेल्या कौतुकाचे सत्ताधारी बाकावरील आमदारांनी बाके वाजवून स्वागत केले. ठाणे शहरातील दोन नेत्यांमध्ये विधानसभेत कौतुकाचा असा सोहळा रंगला होता. एरव्ही हे दोघे एकमेकांवर कडवट शब्दांत टीका करत असतात.

आव्हाड यांनी रात्री साडेतीन वाजता एकनाथ शिंदे यांनी सही केल्याचे सांगितले. त्यावर उपमुख्यमंत्री अजित पवार यांनी आक्षेप घेतला. अध्यक्ष महोदय, रात्री साडेतीन म्हणत नाहीत. पहाटे साडेतीन म्हणतात, अशी दुरुस्ती करत आपल्या एकेकाळच्या सहकाऱ्याला अजितदादांनी सभागृहातून बाहेर जाता जाता टोला लगावला.

उपमुख्यमंत्री अजित पवार यांनी आमदार जितेंद्र आव्हाड यांना लगावलेल्या टोल्यामुळे सभागृहात एकच हशा पिकला. विधानसभा अध्यक्षांसह सर्व सदस्य हास्यकल्लोळात बुडाले होते. त्याचवेळी परिवहन मंत्री प्रताप सरनाईक यांनी पुन्हा एकदा आव्हाडांना टोला लगावण्याचा मोका साधला. ‘बघा, शिका काही तरी अजितदादांकडून...’ असा सल्ला त्यांनी आव्हाडांना दिला.

विधानसभेत आज राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड यांचे वेगळेच रुप पाहायला मिळाले. एरवी लहान लहान गोष्टींवरून एकनाथ शिंदे यांच्यावर टीका करणाऱ्या आव्हाडांनी आज चक्क शिंदे यांचे सभागृहात कौतुक केले.