Mahayuti News : महायुतीला 'धक्का'! शहांच्या मेसेजनंतर भाजपकडून स्वबळाची मोर्चेबांधणी, शिंदे-अजितदादांना धडकी

Mumbai News : आगामी काळात होत असलेल्या स्थानिक स्वराज्य संस्थेच्या निवडणुकीची घोषणा लवकरच होण्याची शक्यता गृहीत धरून सर्वच राजकीय पक्षांनी निवडणुकीची तयारी सुरु केली आहे. त्यातच दोन दिवसापूर्वी मुंबई दौऱ्यावर आलेल्या केंद्रीय गृहमंत्री अमित शहा यांनी स्थानिक स्वराज्य संस्थेच्या निवडणुकीच्या पार्श्वभूमीवर मोठी घोषणा केली आहे. त्यामुळे भाजपने स्थानिकांच्या निवडणुकीसाठी नवी रणनीती आखली असल्याची जोरदार चर्चा सुरु आहे.

भाजपला केवळ मुंबई महापालिका निवडणुकीसाठी महायुती हवी आहे. अन्य ठिकाणी स्वबळावर लढण्याची तयारी भाजपकडून सुरु आहे. त्यातच शहा यांनी स्थानिक स्वराज्य संस्थेच्या निवडणुकीच्या पार्श्वभूमीवर राज्यात येत्या काळात होत असलेल्या 2029 च्या विधानसभा निवडणुकीत भाजपची स्वबळावर सत्ता येईल, असे स्पष्ट करीत भाजपला कुबड्याची गरज नसल्याचे स्पष्ट केले. त्यामुळे महायुतीमधील मित्रपक्ष असलेल्या एकनाथ शिंदेची शिवसेना व अजित पवार यांच्या राष्ट्रवादी काँग्रेसमध्ये अस्वस्थता दिसून येत आहे.

गेल्या काही दिवसापासून स्थानिक स्वराज्य संस्थांमध्ये येत्या काळात महायुती एकत्रित निवडणुका लढणार असल्याचे सांगितले जात असले तरी भाजपने (BJP) आता रणनीतीत बदल केला असल्याची चर्चा जोरात सुरू आहे. भाजपच्या रणनीतीनुसार मुंबई पालिकेत विभाज्य मिळवण्यासाठी महायुतीची आवश्यकता आहे. त्यामुळे याठिकाणी महायुती एकत्रित निवडणूक लढवू शकते.

दुसरीकडे उपमुख्यमंत्री एकनाथ शिंदे यांचा गड असलेल्या ठाणे, कल्याण-डोंबवली, नवी मुंबई या महापालिकेत व उपमुख्यमंत्री अजित पवार यांचा गड असणाऱ्या पुणे, पिंपरी-चिंचवड महापालिका निवडणुकीत भाजप स्वबळ अजमावणार आहे. विशेषतः या ठिकाणी महापालिकेसह जिल्हा परिषद व पंचायत समिती निवडणुकीत भाजप स्वबळावर लढण्याची तयारी करीत आहे.

यापुढील काळात भाजप नेत्यांनी कुबड्यांशिवाय निवडणुका लढविण्याच्या सूचना केंद्रीय गृहमंत्री अमित शहा यांनी दिल्या आहेत. त्याचा प्रत्यय आगामी काळात होत असलेल्या स्थानिक स्वराज्य संस्थांच्या निवडणुकांपासूनच येऊ शकतो, असे राजकीय अभ्यासक व विश्लेषकांचे म्हणने आहे. अमित शाहांच्या या एका वाक्यामुळेच भाजपने स्थानिकच्या निवडणुका स्वबळावर लढण्याची तयारी सुरु केली आहे. त्यामुळे याचा येत्या काळात उपमुख्यमंत्री एकनाथ शिंदे (Eknath shinde) व उपमुख्यमंत्री अजित पवार यांना इशारा दिला असल्याचे एका राजकीय विश्लेषकांनी सांगितले.

राज्यात 2029 मध्ये होत असलेल्या विधानसभा निवडणुकीत भाजपची स्वबळावर सत्ता येईल, असे विधान वर्षभरापूर्वीच केंद्रीय गृहमंत्री अमित शहा यांनी केले होते. प्रदेश भाजपच्या नवीन इमारतीच्या भूमिपूजनाच्या कार्यक्रमातही सोमवारी शहा यांनी भाजपला राज्यात कुबड्यांची गरज नसल्याची स्पष्टोक्ती दिली. त्यामुळे येत्या काळात भाजपचा भर स्वबळ अजमाविण्याकडे असू शकतो. त्यामुळेच भाजपची वाटचाल ही स्वबळाच्या दृष्टीने सुरु आहे.

भाजपला राज्यात कुबड्यांची गरज नसल्याचे अमित शाह यांचे विधान हे येत्या काळात एकनाथ शिंदे यांची शिवसेना आणि अजित पवार यांच्या राष्ट्रवादी काँग्रेसला थेट इशारा असल्याचे मानले जाते. स्थानिक स्वराज्य संस्थांच्या निवडणुकांमध्ये राज्यात सर्वत्र युती व्हावी, अशा प्रयत्नात उपमुख्यमंत्री एकनाथ शिंदे आहेत. मात्र मुंबई आणि मुंबई महानगर प्रदेशातील पालिका वगळता शिंदेंना इतरत्र सोबत घेण्याची भाजपची तयारी नाही. शिंदेंचा मात्र महायुतीमधूनच निवडणूक लढविण्याचा आग्रह आहे. महत्त्वाच्या पालिकांसाठी शिंदेंनी रणनीती आखली आहे.

त्याचप्रमाणे अजितदादांना महायुतीमध्ये निवडणूक लढवायची आहे. त्यामुळे त्यांनी देखील तयारी केली आहे. मात्र, आता ऐनवेळी महायुती होणार नसल्यास त्यांना देखील तयारी करावी लागणार आहे. त्यामुळे भाजपची ही रणनीती मित्रपक्षासाठी अडचणीची ठरणार आहे. त्यामुळे आगामी काळात होत असलेल्या निवडणुकीसाठी भाजप काय निर्णय घेणार याची उत्सुकता लागली आहे.

भाजपच्या भूमिकेकडे लक्ष

अमित शहा यांच्या या घोषणेनंतर आमची महायुती होणारच व महायुती म्हणूनच आम्ही ५१ टक्के मतांची लढाई जिंकू, असा विश्वास महसूलमंत्री चंद्रशेखर बावनकुळे यांनी व्यक्त केला. अमित शहा पक्ष मजबूत करण्याविषयी बोलले आहेत. त्यांच्या विधानाचा दुसरा अर्थ काढू नये, असे स्पष्टीकरण देत स्थानिक स्वराज्य संस्थांच्या निवडणुकीत महायुती एकत्रित लढणार असल्याचे बावनकुळेंनी यांनी सांगितले आहे. त्यामुळे येत्या काळात भाजप काय भूमिका घेणार याकडे सर्वांचे लक्ष लागले आहे.