भाजपने विरोधी पक्षांना सुरूंग लावला! मात्र भीतीच्या छायेखाली स्वकीयच, नेमकं काय घडतयं सांगलीत?

Summary :

1. काँग्रेस आणि राष्ट्रवादी शरदचंद्र पवार गटातील अनेक नेत्यांचा भाजपमध्ये प्रवेश सुरू आहे.

2. जयश्री पाटील, अण्णासाहेब डांगे, वैभव पाटील यांच्यासह माजी महापौर आणि नगरसेवकांचा भाजपमध्ये प्रवेश झाला आहे.

3. आगामी स्थानिक स्वराज्य संस्थांच्या निवडणुकांसाठी भाजप आपले बळकटीकरण करत आहे.

Sangli News : राज्यात होऊ घातलेल्या आगामी स्थानिकची जोरदार तयारी सुरू झाली आहे. सर्वच राजकीय पक्ष मोर्चे बांधणी करताना दिसत असून महायुतीत पक्ष वाढीची रस्सी खेच पाहायला मिळत आहे. अशातच सांगली जिल्ह्यात भाजपकडून मोठे पक्ष प्रवेश होताना दिसत आहे. एकीकडे पक्ष प्रवेशामुळे आगामी स्थानिकमध्ये झेंडा फडकवायचाच, या दिशेने भाजपची वाटचाल सुरू आहे. तर दुसरीकडे होणाऱ्या पक्ष प्रवेशामुळे भाजपच्या मूळ कार्यकर्त्यांमध्ये अस्वस्थता निर्माण झाल्याची कुजबूज सध्या सुरू आहे.

सांगली जिल्ह्यात विधानसभेनंतर मोठे राजकीय हालचाली होताना दिसत आहेत. भाजपसह एकनाथ शिंदे यांच्या शिवसेनेत पक्ष प्रवेश होताना दिसत आहेत. यात अजित पवार यांचा पक्षही मागे राहिलेला नाही. गेल्या दोन महिन्यात महायुतीतील तिनही पक्षात मोठे आणि महत्वाचे पक्ष प्रेवश झाले आहेत. यात सगळ्यात मोठे प्रवेश भाजपमध्ये झाले असून जिल्ह्यात आगामी स्थानिकसाठी भाजपची स्वबळाकडे वाटचाल सुरू असल्याचेच दिसत आहे.

जिल्ह्यात सध्या भाजपमध्ये जोरदार इन्कमिंग सुरू झाले असून काँग्रेस नेत्या जयश्री पाटील, राष्ट्रवादी शरदचंद्र पवार पक्षाचे ज्येष्ठ नेते तथा माजी मंत्री अण्णासाहेब डांगे, राष्ट्रवादीचे वैभव पाटील यांच्यासह महापालिका क्षेत्रातील माजी महापौर, माजी नगरसेवकांनी प्रवेश केला आहे. आतातर काँग्रेसचे शहर-जिल्हाध्यक्ष पृथ्वीराज पाटील आणि राष्ट्रवादी शरदचंद्र पवार पक्षाचे शरद लाड हेही भाजपवासी झाले आहेत. आज या दोघांचा पक्ष प्रवेश झाला आहे.

दरम्यान सध्या सुरू असणाऱ्या इन्कमिंगमुळे भाजपमध्ये नेत्यांची भरती सुरू असून विरोधी पक्षांना ओहोटी लागल्याचे दिसत आहे. तर जे पक्ष प्रवेश होत आहेत. ते पाहता आगामी स्थानिकमध्ये भाजपचा झेंडा फडकलेला दिसेल अशी शक्यता व्यक्त केली जात आहे. तशी शक्यताही पालकमंत्री चंद्रकांत पाटील यांनी व्यक्त करताना एकाआर्थी महायुतीचा महापौर झाल्याचे सांगितले होते. त्यांनी तशी ग्वाही नुकताच झालेल्या कार्यकर्ता मेळाव्यात दिली होती. मात्र नेमका विजय कोणाचा होणार? कोणाचा महापौर हे नेते नाही तर मतदार ठरवत असतात. नेते गेले आहेत. पण कार्यकर्ते अद्याप ज्या त्या पक्षांबरोबरच असल्याचेही सध्याचे चित्र आहे.

एकीकडे नवनियुक्त प्रदेशाध्यक्ष रवींद्र चव्हाण आणि पालकमंत्री चंद्रकांत पाटील जिल्ह्यात सुरू असणाऱ्या इन्कमिंगमुळे सत्ता आपलीच असेल असा दावा करत आहेत. ते नव्या जुन्यांचा मेळ घालण्याची भाषा करत आहेत. मात्र या ‘इनकमिंग’मुळे भाजपच्या मूळ कार्यकर्त्यांमध्ये अस्वस्थता निर्माण झाली आहे. या कार्यकर्त्यांची ही अस्वस्थता कमी करण्यासह नेत्यांची भाऊगर्दी पाहता प्रत्येक गटाला समाधानी करण्याचे आव्हान आता नवनियुक्त प्रदेशाध्यक्ष आणि पालकमंत्र्यांच्या समोर असणार आहे.

दरम्यान ‘इनकमिंग’मुळे पक्षात कशा अडचणी निर्माण होऊ शकतात याचा अंदाज प्रदेशाध्यक्षांना आला असावा. यामुळे त्यांनी, महामंडळे, शासकीय-निमशासकीय समित्या यावर नव्या-जुन्या कार्यकर्त्यांना संधी मिळेल, अशी घोषणा केली आहे. मात्र होणारे प्रवेश पाहता अद्याप महामंडळाचा फॉर्म्युला ठरलेला नसावा किंवा त्यांचे वाटप केलेले नसावे, असाही कयास आता लावला जात आहे. पण जर या नियुक्त्या निवडणूक जाहीर होण्यापूर्वी नाही झाल्या तर भाजपला पक्षांतर्गत असंतोषाला सामोरे जावे लागण्याचीही शक्यता नाकारता येत नाही.

FAQs :

प्र.१: कोणकोणते नेते भाजपमध्ये सामील झाले आहेत?
उ: जयश्री पाटील, अण्णासाहेब डांगे, वैभव पाटील यांच्यासह अनेक माजी महापौर आणि नगरसेवक.

प्र.२: कोणकोणते नेते लवकरच सामील होऊ शकतात?
उ: काँग्रेस शहर-जिल्हाध्यक्ष पृथ्वीराज पाटील आणि राष्ट्रवादीचे शरद लाड.

प्र.३: हा प्रवेश कशासाठी केला जातोय?
उ: आगामी स्थानिक स्वराज्य निवडणुकांमध्ये भाजपचा झेंडा फडकवण्यासाठी.