फलटणच्या डॉक्टर महिलेच्या मृत्यू प्रकरणावरुन महिला आयोगाच्या अध्यक्षा रुपाली चाकणकर या अडचणीत येण्याची शक्यता आहे. कारण या प्रकरणातील घडामोडींवर पत्रकार परिषदेत भाष्य करताना त्यांनी पीडितेची चारित्र्यहनन केल्याचा आरोप त्यांच्यावर करण्यात आला आहे. यामुळं पीडित डॉक्टर महिलेच्या आई-वडिलांनी चाकणकर ज्या पक्षाच्या नेत्या आहेत त्या राष्ट्रवादी काँग्रेसचे प्रमुख अजित पवार यांच्याकडं तक्रार केली आहे. ही तक्रार प्राप्त झाल्यानंतर चाकणकरांच्या विधानांशी आम्ही सहमत नाही, पण त्यांनी असं का केलं? याचा खुलासा त्यांच्याकडून मागवण्यात येईल, अशी स्पष्टोक्ती पवारांनी दिली आहे. चाकणकरांना पदावरुन हटवण्याची मागणी देखील होऊ लागली आहे. त्यामुळं चाकणकरांचं आता काय होणार? याकडं सर्वांच्या नजरा लागून राहिल्या आहेत. पण चाकणकर नेमक्या अडचणीत कशा आल्या? जाणून घेऊयात.
ठाकरे सेनेच्या उपनेत्या सुषमा अंधारे यांनी सलग दोन दिवस पत्रकार परिषद घेऊन फलटणच्या डॉक्टर महिलेच्या मृत्यू प्रकरणावर अनेक दावे केले तसंच कागदपत्रे समोर आणली. याद्वारे त्यांनी माढ्याच्या माजी खासदारांवरही अनेक गंभीर आरोप केले. त्यांचा केवळ या फलटणच्या डॉक्टर महिलेच्या केसमध्येच नव्हे तर बीडच्या ऊसतोड कामगार महिलांबाबत तसंच स्थानिक दोन जुळ्या बहिणींना आत्महत्येस प्रवृत्त केल्याचा आरोप केला.
पण जेव्हा या प्रकरणात माजी खासदारांवर आरोप झाले त्यानंतर मुख्यमंत्री देवेंद्र फडणवीस यांनी या माजी खासदारांचा जे सध्या भाजपत आहेत, त्यांचा या प्रकरणाशी काहीही संबंध नाही. त्यांना या प्रकरणात गोवण्यात आलं आहे, अशा शब्दांत मुख्यमंत्र्यांनी त्यांना क्लीनचीट दिली होती. पण चौकशीपूर्वीच मुख्यमंत्र्यांनी अशा पद्धतीनं क्लीनचीट देण्यावर सुषमा अंधारे यांनी आक्षेप घेतला. तसंच तुम्ही मुख्यमंत्री आणि गृहमंत्री आहात या प्रकरणाची चौकशी करा, न्यायाधीशाच्या भूमिकेत जाऊ नका, अशी सूचना त्यांना केली. यानंतर पोलिसांनी देखील या प्रकरणाशी संबंधित काही गोष्टींचा खुलास करण्यासाठी पत्रकार परिषद घेतली. यावेळी महिला आयोगाच्या अध्यक्षा रुपाली चाकणकर देखील या पत्रकार परिषदेत हजर होत्या. यावेळी पत्रकारांनी पोलीस अधिकऱ्यांना प्रश्न विचारत असताना चाकणकर यांनी मध्येच स्वतःहून या प्रकरणाबाबत माहिती देताना, पीडितेचे आणखी लोकांसोबत चॅट सुरु होते, असा उल्लेख केला.
यावरुन संबंधीत मृत पीडित डॉक्टरच्या चारित्र्यावर प्रश्नचिन्ह उपस्थित करण्यात आल्याचा आरोप अंधारे तसंच समाजातून केला गेला. तसंच महिला आयोगाचं काम पीडित महिलांना मदत करायचं, त्यांचं समुपदेशन करणं हे असतं त्यांची बदनामी करणं किंवा चारित्र्यहनन करणं हे नाही, अशा शब्दांत अंधारे यांनी संताप व्यक्त केला. तसंच याप्रकरणी राष्ट्रवादी काँग्रेसचे प्रदेशाध्यक्ष सुनील तटकरे यांच्याकडं पत्रकार परिषदेतून जाहीर तक्रार करत तुम्ही महिला आयोगाच्या प्रमुखपदी कोणाला बसवलं आहे? ते तुमच्या पक्षाला अडचणीत आणत आहेत, त्यांना पदावरुन तातडीनं हटवा, अशी मागणीही त्यांनी केली.
दरम्यान, पीडित डॉक्टर महिलेच्या आई-वडिलांनी आज राष्ट्रवादीचे प्रमुख अजित पवार यांच्याकडं रुपाली चाकणकर यांची तक्रार केली असून त्यांनी आमच्या मुलीला मदत करण्याऐवजी तिची बदनामी केली असल्याचा आरोप केला. त्यांच्या तक्रारीवर अजित पवारांनी त्यांना अश्वस्त केलं की, रुपाली चाकणकर अशा का बोलल्या यासंदर्भात मी त्यांना विचारणा करणार आहे. तसंच त्यांनी जे काही बोललं त्याचा आणि पक्षाचा काही संबंध नाही. आम्ही त्यांच्या विधानाशी सहमत नाही. त्या अत्यंत चुकीच्या पद्धतीनं बोलल्या असल्याचं देखील अजित पवार यांनी पीडित कुटुंबाला फोनवरुन बोलताना सांगितलं.
रुपाली चाकणकर यांच्यावर अशा प्रकारचा आरोप हा पहिल्यांदाच झालेला नाही. यापूर्वी देखील पुण्यातील वैष्णवी हगवणे प्रकरणात त्यांनी मृत वैष्णवीबाबत माहिती देताना देखील त्यांच्याकडून पीडितेच्या चातित्र्यावर शिंतोडे उडवल्याचे आरोप झाले होते. तसंच या प्रकरणात महिला आयोगाकडं तक्रार येऊनही त्यावर वेळेत कारवाई केली गेली नसल्याचंही म्हटलं गेलं. तसंच स्वारगेट बस डेपोतील महिलेवरील अत्याचार प्रकरणात देखील महिला आयोगाकडून पीडित महिलेचं चारित्र्यहनन करण्यात आल्याचा आरोप विरोधकांकडून केला गेला होता. त्यामुळं सातत्यानं असे प्रकार महिला आयोगाच्या अध्यक्षांकडून होत असल्यानं त्यांना या पदावरुन दूर करा, अशी मागणी सुषमा अंधारे यांच्यासह आता सोशल मीडियातूनही होऊ लागली आहे. त्यामुळं अजित पवारांनी फलटणच्या प्रकरणात भूमिका मांडल्यानंतर चाकणकरांवरही कारवाई होण्याची शक्यता वर्तवली जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.