Kolhapur politics update: बंटींनी ज्यांच्याशी सोयरिक केली तेच यंदा विरोधात; जे होते मुन्नाच्या विरोधात ते येणार एकत्र !

Kolhapur News : राज्यातील राष्ट्रवादी, काँग्रेस आणि शिवसेना एकत्र येण्याआधी ९ वर्षांपूर्वी कोल्हापुरात महाविकास आघाडीचा जन्म झाला. कोल्हापूर महानगरपालिकेच्या इतिहासात पहिल्यांदाच काँग्रेस, राष्ट्रवादी आणि शिवसेना एकत्र येत महाविकास आघाडीची स्थापना झाली. त्यानंतर महापालिकेवर सत्ता स्थापन केली. भाजप आणि महाडिक यांच्या ताराराणी आघाडीला सत्तेपासून बाजूला ठेवण्यासाठी वैद्यकीय शिक्षण मंत्री हसन मुश्रीफ, राज्य नियोजन मंडळाचे अध्यक्ष आमदार राजेश क्षीरसागर आणि काँग्रेस नेते आमदार सतेज पाटील एकत्र आले.

सध्याची राजकीय परिस्थिती पाहता महायुती म्हणून मंत्री हसन मुश्रीफ, राज्य नियोजन मंडळाचे अध्यक्ष आमदार राजेश क्षीरसागर आणि राज्यसभेचे खासदार धनंजय महाडिक यांना महापालिकेत एकत्र यावे लागणार आहे. त्यामुळे गेल्या नऊ वर्षांपूर्वी ज्यांची राजकीय सोयरीक आमदार सतेज पाटील यांनी केली. त्याच मंत्री मुश्रीफ आणि क्षीरसागर यांच्या विरोधात महापालिकेच्या निवडणुकीत लढावे लागणार आहे.

2016 साली झालेल्या कोल्हापूर महानगरपालिकेच्या निवडणुकीत काँग्रेस राष्ट्रवादी आणि शिवसेना (Shivsena) एकत्र येऊन सत्ता स्थापन केली. त्यावेळी कोल्हापूर महानगरपालिकेत काँग्रेसचे 30, राष्ट्रवादीचे 15, शिवसेना 4, ताराराणी आघाडी 19 आणि भाजपचे 14 असे संख्याबळ होते. भाजप आणि ताराराणी आघाडीला सत्तेपासून दूर ठेवण्यासाठी काँग्रेस नेते आमदार सतेज पाटील आणि मंत्री हसन मुश्रीफ एकत्र आले होते.

त्यावेळी स्थानिक राजकारणाचा अंदाज घेत शिवसेनेला देखील सोबत घेऊन महापालिकेत सत्ता स्थापन केली. त्यावेळी ताराराणी आघाडी व भाजपकडून (BJP) राज्यसभेचे खासदार धनंजय महाडिक, मंत्री चंद्रकांत पाटील यांच्या नेतृत्वाखाली ही निवडणूक लढवण्यात आली होती. सध्या गेल्या चार वर्षांपासून कोल्हापूर महानगरपालिकेवर प्रशासकराज सुरू आहे. गेल्या तीन वर्षांपासून राज्यातील राजकीय समीकरणे बदललेली आहेत.

गेल्या पाच वर्षांत शिवसेना व राष्ट्रवादी काँग्रेस या दोन प्रमुख पक्षात फूट पडली. शिवसेना आणि राष्ट्रवादीत दोन गट पडले. कोल्हापूर महानगरपालिकेतील बहुतांश राष्ट्रवादी ही मंत्री मुश्रीफ यांच्या सोबत आहे. तर शिवसेनेतील सध्या दोन नगरसेवक क्षीरसागर यांच्यासोबत आहेत. वरिष्ठ स्तरावरून कोल्हापूर महानगरपालिकेची निवडणूक ही महायुती म्हणून लढावी, असा सूचना सध्या तरी आहेत.

त्यामुळे मंत्री मुश्रीफ आणि राज्य नियोजन मंडळाचे अध्यक्ष राजेश क्षीरसागर यांना राज्यसभेचे खासदार धनंजय महाडिक यांच्यासोबतच राहावे लागणार आहे. सध्या एकसंघ लढावे की स्वतंत्र लढावे, अशी चर्चा झाली नसली तरी महायुती म्हणून तिघांनाच एकत्र निर्णय घ्यावे लागणार आहेत. तर यापूर्वी सतेज पाटील, मुश्रीफ आणि क्षीरसागर एकत्र दिसले. तेच मात्र एकमेकांच्या विरोधात उभे ठाकण्याची शक्यता सध्या तरी दिसते.