Lawrence Bishnoi: लॉरेन्स बिश्नोईची गँग दहशतवादी संघटना घोषित! कॅनडा सरकारचा मोठा निर्णय

Lawrence Bishnoi: खून आणि खंडणीसारख्या अनेक दोन डझनभर गंभीर गुन्हे दाखल असलेला गुंड लॉरेन्स बिश्नोई याची स्वतःची गुन्हेगारांची टोळी आहे. या टोळीमध्ये सुमारे ७०० शार्पशुटर्स असल्याचं सांगितलं जातं. अशाच काही गंभीर गुन्ह्यांमध्ये सध्या लॉरेन्स बिश्नोई हा दिल्लीच्या तिहार तुरुंगात आहे. याच बिश्नोई गँगचे काही लोक हे कॅनडामध्ये स्वतःची टोळी चालवत आहेत. या टोळीच्या विघातक कृत्यांमुळं कॅनडा सरकारनं लॉरेन्स बिश्नोईच्या गँगला दहशतवादी संघटना म्हणून घोषित केलं आहे. त्यामुळं आता बिश्नोई गँगवर कॅनडात मोठे निर्बंध असणार आहेत.

कॅनडाचे पंतप्रधान मार्क कार्नी यांच्या सरकारनं लॉरेन्स बिश्नोईच्या गँगला दहशतवादी संघटना घोषित करण्याचा मोठा निर्णय घेतला आहे. सोमवारी सार्वजनिक सुरक्षामंत्री गैरी आनंदसांगरी यांनी याची घोषणा केली. यासंदर्भात जाहीर केलेल्या एका प्रसिद्धीपत्रकात म्हटलं की, बिश्नोई गँग ही एक आंतरराष्ट्रीय गुन्हेगारी संघटना आहे. जी मुख्यतः भारतात सक्रीय असून कॅनडातही यांची गँग भारतीय समुदयात कार्यरत आहे.

याबाबत मंत्री गैरी यांनी म्हटलं की, कॅनडात प्रत्येक व्यक्तीला आपल्या घरात आणि समुदयात सुरक्षित राहण्याचा अधिकार आहे. त्यामुळं सरकार म्हणून त्यांची सुरक्षा करणं आमची मुलभूत जबाबदारी आहे. पण कॅनडात बिश्नोई गँगकडून विशिष्ट समुदयाला दहशतवादी कारवाया, हिंसा आणि धमक्या दिल्या जात आहेत. त्यामुळं दहशतवादी कृत्यांमध्ये समावेश असेलल्या या टोळीला दहशतवाद्यांच्या यादीत टाकल्यानं आम्हाला त्यांच्यावर आरोप निश्चित करणं तसंच त्यांच्या कारवाया थांबवण्यात शक्तीशाली साधनं उपलब्ध होऊ शकतील.

बिश्नोई गँगवर काय आहेत आरोप?

कॅनडा सरकारनं सांगितलं की, बिश्नोई गँग हत्या, गोळीबार यांसारख्या कारवायांमध्ये गुंतलेली आहे. तसंच जबरदस्तीनं खंडणी वसूल करणं तसंच जीवे मारण्याच्या धमक्या देऊन ते दहशत पसरवत आहेत. ही बिश्नोई गँग प्रवासी समुह, त्यांच्या प्रमुख सदस्यांना, व्यावसायिकांना तसंच सांस्कृतिक पुढाऱ्यांना निशाणा बनवून त्यांच्यामध्ये असुरक्षिततेचं वातावरण तयार करत आहेत, असं कॅनडाच्या सरकारनं सांगितलं आहे.