Tukaram Mundhe : IAS तुकाराम मुंढेंचा थेट अमेरिकेत 'डंका'! The New York Times च्या पहिल्या पानावर जागा

महाराष्ट्राचे अन्न व औषध प्रशासन (FDA) आयुक्त IAS तुकाराम मुंढे पुन्हा एकदा चर्चेत आले आहेत. महाराष्ट्रातील अन्नसुरक्षेसाठी सुरू केलेल्या कठोर मोहिमेची थेट अमेरिकेतील प्रतिष्ठित The New York Times ने दखल घेतली आहे. मुंबईतील हॉटेल्स आणि खाद्यपदार्थ विक्रेत्यांवर सुरू असलेल्या FDA च्या कारवाईवर न्यूयॉर्क टाइम्सने विशेष वृत्त प्रसिद्ध केले असून, त्यात तुकाराम मुंढे यांच्या भूमिकेचा ठळक उल्लेख करण्यात आला आहे.

तुकाराम मुंढे यांनी May 2026 मध्ये महाराष्ट्र FDA आयुक्तपदाची सूत्रे स्वीकारल्यानंतर अन्नभेसळ, अस्वच्छ स्वयंपाकगृहे आणि अन्नसुरक्षा नियमांचे उल्लंघन करणाऱ्या आस्थापनांविरोधात राज्यभर तपासणी आणि कारवाईला वेग दिला. मुंबईसह विविध शहरांमध्ये हॉटेल्स, रेस्टॉरंट्स आणि खाद्यपदार्थ विक्रेत्यांची अचानक तपासणी करण्यात आली. नियमांचे उल्लंघन आढळल्यास नोटिसा, परवाना निलंबन आणि इतर कारवाई करण्यात आली.

The New York Times च्या वृत्तात तुकाराम मुंढे यांच्या मोहिमेला विशेष स्थान देण्यात आले आहे. त्यांच्या कारवाईमुळे मुंबईतील रेस्टॉरंट क्षेत्रात अन्नसुरक्षा आणि स्वच्छतेच्या नियमांकडे अधिक गांभीर्याने पाहिले जात असल्याचे वृत्तात नमूद करण्यात आले आहे. एका अन्नसुरक्षा अधिकाऱ्याच्या कामाची आंतरराष्ट्रीय माध्यमांनी दखल घेणे, ही या मोहिमेतील महत्त्वाची बाब ठरली आहे.

FDA च्या कारवाईची व्याप्तीही मोठी आहे. माहितीनुसार 109 दिवसांत 12,083 तपासण्या करण्यात आल्या, 5,269 सुधारणा नोटिसा बजावण्यात आल्या आणि 603 खाद्य व्यवसायांचे परवाने निलंबित करण्यात आले. या काळात सुमारे 67.2 कोटींचा बेकायदा किंवा दूषित अन्नसाठा जप्त करण्यात आल्याचेही वृत्तात नमूद आहे.

तुकाराम मुंढे हे कठोर आणि नियमाधारित प्रशासकीय कार्यशैलीसाठी यापूर्वीही चर्चेत राहिले आहेत. त्यांच्या 21 वर्षांच्या प्रशासकीय सेवेत 25 वेळा बदल्या झाल्याचा उल्लेखही विविध वृत्तांत करण्यात आला आहे. मात्र, सध्या त्यांची ओळख महाराष्ट्रातील अन्नसुरक्षा मोहिमेमुळे पुन्हा राष्ट्रीय आणि आंतरराष्ट्रीय पातळीवर चर्चेत आली आहे.