Jyotiraditya Scindia : मंत्र्यांनी पराभवाचे खापर फोडले ज्योतिरादित्य शिंदेंवर; भाजपमधील वाद चव्हाट्यावर

Madhya Pradesh News : मध्य प्रदेश भाजपमधील वाद चव्हाट्यावर आला आहे. विधानसभेच्या पोटनिवडणुकीत पराभूत झालेल्या मंत्र्यांनी थेट केंद्रीय मंत्री ज्योतिरादित्य शिंदे यांच्यावर आगपाखड केली आहे. त्याला शिंदे यांनीही प्रत्युत्तर दिल्याने हा वाद वाढला आहे. तसेच एका भाजप आमदारानेही शिंदेंच्या भूमिकेवर ठपका ठेवला आहे. त्यामुळे भाजपमध्ये अंतर्गत धुसफूस सुरू असल्याचे चित्र निर्माण झाले आहे.

ज्योतिरादित्य शिंदे आणि पर्यावरण राज्यमंत्री रामनिवास रावत यांच्यात हा वाद सुरू झाला आहे. विजयपूर विधानसभा मतदारसंघातील पोटनिवडणुकीत रावत यांचा पराभव झाला आहे. त्यांना काँग्रेसचे उमेदवार मुकेश मल्होत्रा यांनी सात हजार मतांनी पराभूत केले. रावत यांनी 2023 मध्ये झालेल्या निवडणुकीत काँग्रेसच्या तिकीटावर विजय मिळवला होता. त्यानंतर ते भाजपमध्ये दाखल झाले होते.

रावत यांनी आमदारकीचा राजीनामा देऊन भाजपमध्ये प्रवेश केला होता. त्यांना लगेच पर्यावरण राज्यमंत्रीही करण्यात आले. पण पोटनिवडणुकीत पराभूत झाल्याने त्यांचे मंत्रिपद धोक्यात आले आहे. रावत यांच्यासाठी हा मोठा धक्का आहे. यापूर्वी ते चारवेळा आमदार होते. या पराभवानंतर रावत यांनी कुणाचेही नाव न घेता काही लोकांना माझी वाढलेली पत पाहवत नसल्याची टीका केली होती.

मी मंत्री झाल्याचे काही लोकांना पटले नाही. आपले पद धोक्यात आल्याचे काहींना वाटले. त्यामुळे लोकांना विचलित करण्यात आले, असेही रावत म्हणाले होते. रावत यांच्या प्रचारात भाजपचे राज्यातील अनेक नेते सहभागी झाले होते. पण ज्योतिरादित्य शिंदे एकदाही प्रचारात दिसले नाहीत. रावत यांच्या पराभवावर शिंदे म्हणाले, आम्हाला आत्मपरीक्षण करण्याची गरज आहे. माझ्याकडे विचारणा केली असती तर नक्कीच प्रचाराला गेलो असतो.

भाजप आमदार भगवानदास सबनानी यांनी शिंदे यांना प्रचाराबाबत विचारणा करण्यात आला होता, असा दावा केला आहे. स्टार प्रचारकांच्या यादीत त्यांचे नाव होते. मात्र खूप बिझी असल्यामुळे येणार नसल्याचे त्यांनी सांगितले होते, असेही सबनानी यांनी म्हटले आहे. त्यामुळे भाजपमधील अंतर्गत धुसफूस समोर आली आहे. विशेष म्हणजे काँग्रेसमध्ये असताना शिंदे यांनी रावत यांचा प्रचार केला होता.