Manipur Violence : ‘एनडीए’मध्ये फूट; मणिपूर हिंसेमुळे नाराज मित्रपक्षाने काढला सरकारचा पाठिंबा, भाजपसमोर संकट

New Delhi : मागील अनेक महिन्यांपासून अशांत असलेल्या मणिपूरमध्ये पुन्हा हिंसा सुरू झाली आहे. त्याचा पहिला राजकीय फटका आता सत्ताधारी भाजप सरकारला बसला आहे. एनडीएमधील मित्रपक्ष असलेल्या नॅशनल पीपल्स पार्टीने मणिपूरमधील भाजप सरकारचा पाठिंबा काढत असल्याची घोषणा केली आहे. त्यामुळे भाजपला मोठा धक्का बसला आहे.

मुख्यमंत्री एन. बीरेन सिंह यांच्या नेतृत्वाखालील राज्य सरकार सध्याची स्थिती नियंत्रणात आणण्यात अपयशी ठरल्याने तातडीने पाठिंबा मागे घेत असल्याचे ‘एनपीपी’ने जाहीर केले आहे. या पक्षाचे विधानसभेत सात आमदार आहेत. पक्षाने भाजपचे राष्ट्रीय अध्यक्ष जे. पी. नड्डा यांनी पक्ष लिहून आपला निर्णय कळवला आहे.

'एनपीपी'ने पत्रात मणिपूरमधील बिघडलेल्या कायदा-सुव्यवस्थेवर नाराजी व्यक्त केली आहे. मागील काही दिवसांपासून आम्ही राज्यातील स्थिती अधिक बिघडताना पाहत आहोत. यामध्ये अनेक निरपराध लोकांचा जीव गेला आहे. राज्यातील लोक अनेक अडचणींचा सामना करत आहेत. राज्य सरकार लोकांच्या समाधान करण्यात पूर्णपणे अपयशी ठरल्याचे पत्रात म्हटले आहे.

सध्याची स्थिती पाहता आम्ही मणिपूर बीरेन सिंह यांच्या नेतृत्वाखालील सरकारचा पाठिंबा तात्काळ मागे घेत असल्याचे 'एनपीपी'ने या पत्रातून स्पष्ट केले आहे. दरम्यान, शनिवारी राज्यात अचानक मोठी हिंसा भडकली. त्यानंतर राज्यांतील काही जिल्ह्यांमध्ये कर्फ्यू लावण्यात आला असून दोन दिवस इंटरनेट सेवाही बंद करण्यात आल्या आहेत. केंद्रीय गृहमंत्री अमित शाह महाराष्ट्राचा दौरा अर्धवट सोडून दिल्ली गेले आहेत.

भाजप सरकारला धोका नाही

एनपीपी पक्षाने भाजप सरकारचा पाठिंबा काढला असला तरी सरकारला कोणताही धोका नाही. भाजपकडे बहुमताच्या जादुई आकड्यापेक्षा अधिक आमदार आहे. 2022 च्या निवडणुकीत भाजपचे 32 आमदार निवडून आले होते. तर एनपीपीला सात जागा मिळाल्या होत्या. मात्र, असे असले तरी भाजपमधील आमदारांमध्येही नाराजीचे वातावरण आहे. त्यामुळे राज्यातील भाजप सरकारसमोर संकट उभे राहण्याची भीती आहे.