NEET Paper Leak: NTAनं पुन्हा जबाबदारी झटकली! संसदीय समितीला सांगितलं आमच्या सिस्टिमची चूक नव्हतीच; व्हायरल झालेला पेपर...

NEET Paper Leak: वैद्यकीय शिक्षणासाठीच्या पात्रता आणि प्रवेश परीक्षेचा (NEET) पेपर फुटीप्रकरणी सध्या नॅशनल टेस्टिंग एजन्सी (NTA) आरोपीच्या पिंजऱ्यात आहे. या प्रकरणी उच्चस्तरीय चौकशी सुरु झाली असून राज्यसभा खासदार दिग्विजय सिंह यांच्या अध्यक्षतेखाली एका संसदीय समितीमार्फत याची चौकशी केली जात आहे. या समितीच्या समोर आज एनटीएकडून पुन्हा एकदा आपली जबाबदारी झटकण्याचा प्रकार घडला आहे.

पीटीआयच्या वृत्तानुसार, एनटीएनं समितीसमोर सांगितलं की, ०३ मे रोजी आयोजित नीट परीक्षेचा पेपर लीक झालाच नव्हता. तर सोशल मीडियातून आणि विद्यार्थ्यांकडे फिरत असलेला पेपर हा गेस पेपर होता. त्यामुळं आमच्या सिस्टिमकडून कुठलाही पेपर लीक झालेला नाही. त्यावर संसदीय समितीनं एनटीएला विनंती केली की, पेपर लीकची योग्य व्याख्या समजून घ्यावी आणि त्यानंतर २०१८ नंतर पेपर लीक झाला की नाही हे सांगावं.

दिग्वीजय सिंह यांच्या नेतृत्वाखाल शिक्षण, महिला, मुलं, तरुण आणि खेळांच्या प्रकरणातील संसदीय समितीनं नीट पेपर लीक आणि सीबीएसईच्या ऑन स्क्रीन मार्किंग सिस्टिम (OSM) शी संबंधीत वादांची चौकशी करत आहे. या समितीनं या चौकशीसाठी NTA आणि सीबीएसई दोन्हींच्या वरिष्ठ अधिकाऱ्यांना चौकशीसाठी बोलावलं आहे. या समितीनं OSM सिस्टिम संदर्भात सीबीएसई आणि नीटच्या पेपर लीक प्रकरणी एनटीएकडून लिखित उत्तर मागितलं आहे.

दरम्यान, त्यांनी राधाकृष्णन समितीच्या १०१ शिफारशींपैकी प्रत्येक शिफारशींवर एक सविस्तर अहवाल आणि प्रत्येक शिफारशीच्या उत्तरादाखल एनटीएनं काय कारवाई केली याची माहिती मागितली. तसंच सीबीएसईच्या पॅनलला विचारलेल्या प्रश्नांना ८ जूनपर्यंत उत्तर देण्यास सांगितलं आहे. तर NTA ला १० जूनपर्यंत लिखित उत्तर द्यावं लागणार आहे. पण या दोन्ही एजन्सीजनं अद्यापर्यंत उत्तर दिलेलं नाही, अशी माहितीही सुत्रांकडून कळते आहे.