Serbian Parliament : संसदेत खासदारांनीच फेकले स्मोक ग्रेनेड, ‘धुवां’धार राडा; Video पाहून बसेल धक्का

Chaos in Parliament : सर्बियाच्या संसदेत मंगळवारी जोरदार राडा झाला. सरकारविरोधात नाराजी व्यक्त करताना विरोधी पक्षातील खासदारांनी थेट संसदेत स्मोक ग्रेनेड फेकले. अश्रूधुरांच्या नळकांड्या फोडल्या. सत्ताधारी खासदारांनीही विरोधकांनी फेकलेले ग्रेनेड त्यांच्या दिशेने उलट फेकत प्रत्युत्तर दिल्याने गोंधळात अधिकच भर पडली.

सरकारच्या धोरणाविरोधात विरोधी पक्षातील खासदारांनी हे कृत्य केल्याने आश्चर्य व्यक्त केले जात आहे. या घटनेचा व्हिडिओ सोशल मीडियात वेगाने व्हायरल होत आहे. चार महिन्यांपूर्वी एका रेल्वे स्थानकाचे छत कोसळल्याने 15 लोकांचा मृत्यू झाला होता. त्यानंतर सरकारविरोधात सर्बियात ठिकठिकाणी आंदोलन झाले होते. त्यामुळे सरकारची डोकेदुखी चांगलीच वाढली आहे.

सर्बियामध्ये प्रगतीशील पक्षाचे सरकार आहे. या सरकारकडून मंगळवारी देशातील विद्यापीठांचे शुल्क वाढविण्याबाबतचा कायदा पारित करण्यात येणार होता. त्याविरोधात यापूर्वीही देशात विद्यार्थ्यांनी आंदोलन केले होते. या विद्यार्थ्यांच्या समर्थनार्थ विरोधी पक्षातील खासदारांनी सरकारविरोधात आवाज उठवला होता.

मंगळवारी या खासदारांनी आपल्या जागेवरून उठत संसद अध्यक्षांसमोरील मोकळ्या जागेत येऊन घोषणाबाजी सुरू केली. सुरक्षारक्षकांसोबत खासदारांची धक्काबुक्कीही झाली. त्यानंतर लगेचच या खासदारांनी स्मोक ग्रेनेड व अश्रूधुराच्या नळकांड्या टाकण्यास सुरूवात केली. संसदेत अचानक घडलेल्या या प्रकारामुळे सर्वांचीच तारांबळ उडाली.

संसदेत काळ्या आणि गुलाबी रंगाचा धूर पसरल्याने अभूतपूर्व स्थिती निर्माण झाली होती. अशातच सत्ताधारी खासदारांकडूनही आपल्या बाजूला आलेल्या नळकांड्या विरोधी पक्षाच्या खासदारांच्या दिशेने फेकडण्यात आल्याने संपूर्ण सभागृहातच धूराचे साम्राज्य पसरले. या राड्यामध्ये काही खासदार जखमी झाल्याचे सांगितले जात आहे.