Sharad Pawar : मोदींची राज्यसभेत नेहरूंवर टीका; शरद पवारांचा पंतप्रधानांवर हल्लाबोल; म्हणाले...

मोदी सरकारच्या दुसऱ्या कार्यकाळातील अखेरचं संसदीय अधिवेशन सुरू आहे. पंतप्रधान नरेंद्र मोदी यांनी ( Pm Narendra Modi ) राष्ट्रपतींच्या अभिभाषणावर सोमवारी ( 5 फेब्रुवारी ) उत्तर देताना माजी पंतप्रधान जवाहरलाल नेहरू यांच्यावर टीका केली होता. आज बुधवारी राज्यसभेत बोलताना पंतप्रधानांनी पुन्हा नेहरूंना लक्ष्य केलं आहे. यावरून माजी केंद्रीय, खासदार शरद पवार यांनी पंतप्रधानांवर जोरदार हल्लाबोल केला आहे. ते दिल्लीत विद्यार्थ्यांशी संवाद साधत होते.

पंतप्रधान मोदी काय म्हणाले?

"मी माजी पंतप्रधान नेहरूंना अलीकडे जास्त आठवत आहे. एकदा नेहरूंनी मुख्यमंत्र्यांना पत्र लिहिलं होतं. त्या पत्रात नेहरूंनी म्हटलेलं, 'मला कुठलंही आरक्षण आवडत नाही. नोकरीतील आरक्षण तर कदापीही आवडत नाही.' ते जन्मजात आरक्षणाच्या विरोधात आहेत. एससी, एसटी आणि ओबीसींना आरक्षण मिळालं, तर सरकारी कामाकाजाचा स्तर खालावतो, असंही नेहरूंचं मत होतं," अशी टीका पंतप्रधान मोदींनी केली होती.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

यावर शरद पवार ( Sharad Pawar ) म्हणाले, "पंतप्रधानांचं राज्यसभेतील भाषण ऐकून मला दु:ख झालं. पंतप्रधान देशाचे असतात, कुठल्याही एका पक्षाचे नाही. देशाची जबाबदारी पंतप्रधानांच्या खांद्यावर असते. मोदींनी राज्यसभेत नेहरूंवर टीका केली. पण, देशाच्या स्वातंत्र्यलढ्यात महात्मा गांधींबरोबर जवाहरलाल नेहरूंनीही योगदान दिलं आहे.

"स्वातंत्र्यानंतर देशाचा चेहरा बदलणे आणि भारताचं नाव जगभरात पोहोचवण्यासाठी ज्यांनी योगदान दिलं, त्यामध्ये जवाहरलाल नेहरूही होते. लोकशाहीला ताकद देण्याचं काम नेहरूंनी केलं. विज्ञान आणि तंत्रज्ञानाला नेहरूंनी चालना दिली," असं शरद पवारांनी म्हटलं.

"राजकारणात वेगवेगळी विचारधारा आणि मतभिन्नताही असते. पण, नेहरू, लालबहाद्दूर शास्त्री, इंदिरा गांधी यांचं देशासाठीचं योगदान आपण विसरू शकत नाही," असं शरद पवारांनी सांगितलं.