Sharad Pawar: वाढदिवसाचं निमित्त! अजित पवार, प्रफुल्ल पटेल शरद पवारांच्या भेटीसाठी दिल्लीत दाखल; मविआचे नेतेही पोहोचले

Sharad Pawar Birthday Reception: ज्येष्ठ नेते शरद पवार यांच्या वाढदिवसानिमित्त राष्ट्रवादी काँग्रेसचे नेते अजित पवार आणि त्यांच्या काही सहकाऱ्यांसह महाविकास आघाडीचे नेते हे दिल्लीतील पवारांच्या निवासस्थानी दाखल झाले आहेत. या गाठीभेटींमुळं राज्याच्या राजकारणात चर्चांणा उधाणं आलं आहे. त्यामुळं हे सर्वजण केवळ स्नेहभोजनाच्या कार्यक्रमानिमित्त एकत्र आलेत की इतर काही राजकीय चर्चाही यावेळी होणार आहे, याकडं सर्वांच लक्ष लागून राहिलं आहे.

१२ डिसेंबर रोजी शरद पवार यांचा वाढदिवस असतो. यानिमित्त आज दिल्लीतील पवारांच्या निवासस्थानी राज्यातील खासदारांसाठी स्नेहभोजनाच्या कार्यक्रमाचं आयोजन करण्यात आलं आहे. यानिमित्त दोन्ही राष्ट्रवादीचे खासदार आणि नेतेमंडळी एकत्र आली आहेत. अजित पवारही मुंबईहून दिल्लीला रवाना झाले असून शरद पवारांच्या निवासस्थानी पोहचले आहेत. त्याचबरोबर महाविकास आघाडीतील इतर पक्षांचे खासदार आणि नेतेमंडळींना देखील या स्नेहभोजनासाठी आमंत्रित करण्यात आल्यानं ते देखील पवारांच्या निवासस्थानी दाखल झाले आहेत.

अजित पवारांसोबत प्रफुल्ल पटेल हे देखील शरद पवारांच्या भेटीसाठी पोहोचले आहेत. राज्यात सध्या स्थानिक स्वराज्य संस्थांच्या निवडणुकांचा माहोल आहे, त्यात दिल्लीमध्ये स्हेनभोजनानिमित्त दोन्ही राष्ट्रवादीचे नेतेमंडळी एकत्र आले आहेत. त्यामुळं महाराष्ट्राच्या राजकीय वर्तुळात चर्चांना उधाण आलं आहे. अजित पवारांनी शरद पवारांची साथ सोडून आणि मविआतून बाहेर पडून भाजप आणि एकनाथ शिंदेंच्या शिवसेनेसोबत घरोबा केला आहे. राज्यात सध्या ते सत्तेतही आहेत, अधुनमधून महायुतीतील नाराजीच्या बातम्याही येत असतात. यापार्श्वभूमीवर या भेटीगाठींना आणि चर्चांना विशेष महत्व प्राप्त झालं आहे.