शिवसेना कदापी माफी मागणार नाही : चतुर्वेदींचा आक्रमक पवित्रा

नवी दिल्ली : सरकारने राज्यसभेतील १२ खासदारांच्या (12 MP Suspended) केलेल्या निलंबनावरुन सुरु झालेला गोंधळ शांत होताना दिसत नाही. आज विरोधी पक्षांनी बैठकांचा धडाका लावला आहे. सोबतच निलंबित खासदार काँग्रेसचे (Congress) खासदार राहूल गांधी (Rahul Gandhi) यांच्या नेतृत्वात उपसभापतींच्या भेटीला गेले आहेत. तिकडे सरकारकडून माफी मागितली तर निलंबन मागे घेवू असा प्रस्ताव येत असल्याचे सांगितले जात आहे. पण शिवसेनेचे खासदार कदापि माफी मागणार नाहीत, असा ठाम पवित्रा शिवसेनेच्या निलंबित खासदार प्रियांका चतुर्वेदी (Shivsena MP Priyanka Chaturvedi) यांनी घेतला.

विधेयके रेटण्यासाठी आणि विरोधकांचा आवाज दाबण्यासाठी सरकारने ही निलंबनाची कारवाई केली असल्याची टीका प्रियांका चतुर्वेदी यांनी केली. सोबतच सरकारचे हे कोणत्या प्रकारचे असंसदीय वर्तन सुरू आहे? असाही सवाल त्यांनी विचारला. जिल्हा न्यायालय ते सर्वोच्च न्यायालयापर्यंत आरोपींना बाजू मांडण्याची संधी दिली जाते. त्यांना वकील दिले जातात तर कधी सरकारी अधिकारी त्यांची बाजू ऐकायला जातात. मात्र संसदेत आम्हाला आमची बाजू मांडण्याची संधी दिलीच नाही, असा देखील आरोप प्रियांका चतुर्वेदी यांनी केला.

तसेच नियम २५६ नुसार ज्या अधिवेशनात गोंधळ झाला त्याच अधिवेशनात गोंधळी सदस्यांचे निलंबन करता येते. दुसऱ्या अधिवेशनात तशी कारवाई करता येत नाही व त्यामुळे ही कारवाई अत्यंत चुकीची आहे. दुसरीकडे आम्हाला अंधारात ठेवून ही कारवाई केली गेली ती बेकायदा आहे. याबाबत आपण सभापती वैकंय्या नायडू यांना भेटून दाद मागणार असल्याचे चतुर्वेदी म्हणाल्या.

दूसऱ्या बाजूला माफी मागितली तर निलंबन मागे घेऊ अशा पद्धतीच्या सरकारी प्रस्तावाच्या चर्चा आहेत. यावर त्या म्हणाल्या शिवसेनेचे खासदार कदापि माफी मागणार नाहीत. माफी कोणत्या गोष्टींसाठी? शेतकऱ्यांसाठी, लोकशाही मूल्यांसाठी लढतोय, त्यासाठी? देशातील जनतेचा आवाज उठवतोय? लाखो विमा कर्मचाऱ्यांचा आवाज बनतोय, मग माफी कसली? खासदार माफी मागणार नाहीत, असेही त्यांनी स्पष्ट केले.