Vice President election : अखेर ठरलं! राधाकृष्णन यांना भिडणार सुप्रीम कोर्टाचे माजी न्यायमूर्ती, इंडिया आघाडीकडून घोषणा

NDA Vs India Alliance : उपराष्ट्रपती पदाची निवडणूक बिनविरोध होणार की नाही, याबाबत मागील काही दिवसांपासून जोरदार चर्चा सुरू होती. त्यावर आता पडदा पडला आहे. इंडिया आघाडीकडूनही उमेदवाराची घोषणा करण्यात आली आहे. एनडीएचे उमेदवार असलेले महाराष्ट्राचे राज्यपाल सी. पी. राधाकृष्णन यांच्या विरोधात आघाडीने सुप्रीम कोर्टाच्या माजी न्यायमूर्तींना उमेदवारी जाहीर केली आहे.

काँग्रेसचे अध्यक्ष मल्लिकार्जून खर्गे यांनी उमेदवाराच्या नावाची घोषणा केली. सुप्रीम कोर्टाचे माजी न्यायमूर्ती बी. सुदर्शन रेड्डी यांना विरोधकांनी मैदानात उतरविण्याचा निर्णय घेतला आहे. त्यामुळे राधाकृष्णन विरुध्द सुदर्शन रेड्डी अशी लढत होणार, हे निश्चित झाले आहे. सुप्रीम कोर्टात न्यायमूर्तीपदी बढती मिळण्याआधी रेड्डी हे गुवाहाटी हायकोर्टाचे मुख्य न्यायमूर्ती होते. त्याआधी ते आंध्र प्रदेश हायकोर्टात न्यायमूर्ती होते.

रेड्डी हे 2011 मध्ये सुप्रीम कोर्टाचे न्यायमूर्ती म्हणून निवृत्त झाले आहेत. उमेदवाराची घोषणा करताना खर्गे म्हणाले, उपराष्ट्रपती पदाची निवडणूक म्हणजे विचारधारेची लढाई आहे. सर्व विरोधी पक्षांची त्याला संमती आहे. सध्या लोकशाही मुल्यांवर हल्ला होत आहे. रेड्डी हे सामाजिक आणि राजकीय न्यायाचे चॅम्पियन असल्याचेही खर्गे यांनी सांगितले.

मित्रपक्षांची मागणी मान्य

इंडिया आघाडीतील मित्रपक्षांची मागणी काँग्रेसकडून पूर्ण करण्यात आली आहे. टीएमसीने अराजकीय व्यक्तीला उमेदवारी देण्याची मागणी केली होती. तर डीएमकेने तमिळनाडू किंवा दक्षिण भारतातील उमेदवार असावा, असे म्हटले होते. त्यामुळेच बी. सुदर्शन रेड्डी यांना उमेदवारी देण्यात आल्याचे सांगितले जात आहे.

सत्ताधाऱ्यांनाही आव्हान

सुदर्शन रेड्डी हे मुळचे आंध्र प्रदेशचे आहेत. तसेच माजी न्यायमूर्तीही आहेत. त्यामुळे आंध्र प्रदेशातील सत्ताधारी टीडीपी आणि विरोधी वायएसआर काँग्रेससह तेलंगणातील बीआरएस या पक्षांनाही आघाडीने कोंडीत पकडल्याची चर्चा आता सुरू झाली आहे. या पक्षांनाही आता मतदान करताना विचार करावा लागेल, असा डाव आघाडीने टाकला आहे.