Modi Government : डॉक्टरांवरील हल्ल्यांबाबत मोदी सरकारचा महत्वाचा आदेश; बंगालमधील घटनेनंतर खडबडून जाग

New Delhi : पश्चिम बंगालमधील एमजी कर वैद्यकीय महाविद्यायातील ट्रेनी डॉक्टरवर बलात्कार करून खून केल्याच्या घटनेने संपूर्ण देश हादरून गेला आहे. त्यातच महाविद्यालयात दोन दिवसांपूर्वी मोठा हिंसाचार झाल्यानंतर केंद्र सरकारला खडबडून जागा आली असून डॉक्टर व इतर कर्मचाऱ्यांवरील हल्ल्यांबाबत मोठा निर्णय घेण्यात आला आहे.

केंद्रीय आरोग्य मंत्रालयाने शुक्रवारी महत्वाचा आदेश काढला आहे. देशातील सर्व सरकारी रुग्णालयांमध्ये डॉक्टर किंवा इतर कर्मचाऱ्यांवर मारहाण झाल्यास त्याची सहा तासांच्या आत पोलिसांत तक्रार करण्याचे आदेश देण्यात आले आहेत. याची जबाबदारी संबंधित रुग्णालयाच्या प्रमुखांची असणार आहे. तक्रार न केल्यास त्याला प्रमुखांना जबाबदार धरले जाणार आहे.

आरोग्य मंत्रालयाने आदेशात म्हटले आहे की, सरकारी रुग्णालयांतील डॉक्टर आणि इतर कर्मचाऱ्यांना मारहाणीच्या घटना सातत्याने घडत आहेत. कामावर असताना आरोग्य कर्मचाऱ्यांवर हे हल्ले होत आहेत. अनेकांना धमकावले जात असून शिवीगाळही केली जाते. रुग्ण किंवा त्यांच्या नातेवाईकांकडून असे प्रकार होत आहेत. यापार्श्वभूमीवर ड्युटीवर असलेल्या आरोग्य कर्मचाऱ्यांबाबतची कोणतीही हिंसा घडल्यास संबंधित सस्थेच्या प्रमुखाने सहा तासांच्या आत पोलिसांत तक्रार करावी, असे आदेशात स्पष्ट करण्यात आले आहे.

बंगालमधील शासकीय रुग्णालयात ट्रेनी डॉक्टरवर बलात्कार आणि खूनाच्या घटनेनंतर हा आदेश काढण्यात आला आहे. या घटनेबाबत तक्रार करण्यास आणि गुन्हा दाखल करण्यास विलंब झाल्याचा आरोप होत आहे. पीडितेच्या पालकांसह देशभरातील ट्रेनी डॉक्टर, तसेच इंडियन मेडिकल असोसिएशनकडून संताप व्यक्त केला जात आहे.

दोन दिवसांपूर्वी रात्री अडीच ते तीन हजार लोकांच्या जमावाने एमजी कर वैद्यकीय महाविद्यालयासमोर निदर्शने केली होती. जमावातील काहींनी रुग्णालयात घुसून प्रचंड नासधूस केली. काही डॉक्टर व कर्मचाऱ्यांना मारहाण केल्याचा आरोपही होत आहे. त्यावरूनही सुरक्षेचा प्रश्न निर्माण झाला आहे. याची दखल घेत केंद्रीय आरोग्य मंत्रालयाने तातडीने पावले उचलत ‘एफआयआर’बाबत आदेश काढला आहे.