Ajit Pawar Plane Crash News : राज्याचे उपमुख्यमंत्री तथा राष्ट्रवादी काँग्रेस पक्षाचे (अजित पवार) सर्वेसर्वा अजित पवार यांचे बारामती येथील विमान अपघातात निधन झालं. मुंबईहून बारामतीमध्ये आलेल्या विमानाचे लँडिंग होत असताना झालेल्या या भयानक अपघातात अजित पवारांसह सहा जणांचा मृत्यू झाल्याची माहिती डीजीसीएने दिली आहे.
अजित पवारांच्या मृत्यूमुळे संपूर्ण देशावर शोककळा पसरली आहे. अजित पवारांच्या जाण्याने सर्व स्तरातून हळहळ व्यक्त केली जात आहे. आपल्या हक्काचा आणि सदैव कामाने झपाटलेला नेता आमच्यातून गेल्याची भावना कार्यकर्त्यांकडून व्यक्त केली जात आहे.
नेहमी रोखठोक भूमिका घेणारे अजित पवार शेवटच्या क्षणापर्यंत आपल्या कामातच व्यस्त असल्याचं समोर आलं आहे. कारण आज त्यांच्या बारामतीत दिवसभरात चार सभा होणार होत्या आणि त्यासाठीच ते बारामतीला येत होते. मात्र, त्यांनी आपल्या लाडक्या बारामतीत पाय ठेवण्याआधीच त्यांच्यावर काळाने घाला घातला.
दरम्यान, अजित पवारांची काम करण्याची पद्धत आणि तळमळ त्यांच्या एक्स या सोशल मिडिया प्लॅटफॉर्मवरील शेवटच्या पोस्टमधून देखील पाहायला मिळत आहे. कारण अजित पवारांनी काल मंगळवारी (ता.२७) राज्य सरकारच्या मंत्रिमंडळाच्या बैठकीत घेतलेल्या निर्णयाची माहिती पोस्टद्वारे दिली होती.
हीच त्यांची अखेरची पोस्ट ठरली आहे. यामध्ये त्यांनी आपल्या विश्वासू राज्य सरकारनं आजच्या मंत्रिमंडळाच्या बैठकीत घेतलेले काही महत्त्वपूर्ण निर्णय, असं लिहित कालच्या बैठकीत कोणकोणते निर्णय घेतले त्याची यादी दिली आहे.
यामध्ये, होतकरू युवकांना दिलासा देण्यासाठी औद्योगिक प्रशिक्षण संस्थामध्ये 'पीएम सेतू' योजना राबविण्यात येणार, कंत्राटदारांची प्रलंबित देयके अदा करण्यासाठी ट्रेड्स प्लॅटफॉर्म (TReDS Platform). सार्वजनिक बांधकाम विभागाशी निगडित सूक्ष्म, लघू व मध्यम कंत्राटदार उद्योजकांसाठी सुविधा निर्माण करणार.
यासह धुळे येथील जवाहर शेतकरी सहकारी सूतगिरणीचे पुनरूज्जीवन होणार. राष्ट्रीय सहकारी विकास निगम, नवी दिल्ली यांच्याकडे शिफारस. आणि वेगवेगळ्या कारणांसाठी देण्यात येणाऱ्या शासकीय जमिनीच्या भाडे पट्टे कालावधी वाढवून देण्यात येणार.
तसंच केंद्र सरकार किंवा राज्य शासनाच्या ताब्यातील शत्रू संपत्तीच्या विक्री-खरेदीसाठी मुद्रांक शुल्क माफ करण्याचा निर्णय, असे विविध निर्णय घेतल्याची माहिती त्यांनी आपल्या या पोस्टमधून दिली आहे. अजित पवारांनी आपल्या कामासंबंधी केलेलं हे आता शेवटचं ट्विट ठरलं आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.