Aditi Tatkare : सामंतांचे सारे प्रयत्न निष्फळ; भरतशेठ गोगावलेंना पुन्हा ठेंगा... '15 ऑगस्टचा' मान आदिती तटकरेंना

Mumbai News : रायगडाचा पालकमंत्री कोण या मुद्द्यावरून गेल्या आठ महिन्यापासून वाद सुरु आहे. अदिती तटकरे यांना रायगडचे पालकमंत्रीपद दिल्यानंतर एकनाथ शिंदे यांच्या शिवसेनेचे मंत्री भरत गोगावले यांनी नाराजी व्यक्त केली होती. त्यानंतर मुख्यमंत्री देवेंद्र फडणवीस यांनी रायगड व नाशिकच्या पालकमंत्री नियुक्तीला स्थगिती दिली होती. मात्र, अद्यापपर्यंत यावर निर्णय झालेला नसताना आता रायगडमध्ये अदिती तटकरे यांच्या हस्ते १५ ऑगस्टला ध्वजारोहण केले जाणार आहे. तशास्वरूपाचे परिपत्रक काढण्यात आले आहे.

गेल्या नऊ महिन्यापासून रायगडच्या पालकमंत्रीपदाचा तिढा अजून सुटलेला नाही. यंदा 15 ऑगस्टला फलोत्पादन व रोजगार हमी मंत्री भरत गोगावले (Bharat Gogavle) यांना ध्वजारोहण करण्याचा मान मिळावा, अशी अपेक्षा उद्योगमंत्री उदय सामंत यांनी व्यक्त केली होती. मात्र, यावर कोणताच निर्णय झाला नाही. त्यातच आता सोमवारी महिला व बालकल्याणमंत्री अदिती तटकरे यांच्या हस्ते १५ ऑगस्टला रायगडचे ध्वजारोहण केले जाणार आहे, तशास्वरूपाचे परिपत्रक काढण्यात आले आहे.

रायगडमध्ये 15 ऑगस्टच्या ध्वजारोहणाचा मान कोणाला मिळणार याची उत्सुकता गेल्या काही दिवसापासून लागली असतानाच आता अदिती तटकरे (Aditi tatkare) यांच्या हस्ते ध्वजारोहण केले जाणार असल्याचे स्पष्ट करण्यात आल्याने राष्ट्रवादी काँग्रेसच्या कार्यकर्त्यांत आनंदाचे वातावरण आहे.

दुसरीकडे यावेळेसही भरत गोगावले यांना ध्वजारोहण करण्याचा मान मिळाला नसल्याने एकनाथ शिंदे यांच्या शिवसेनेत नाराजीचे वातावरण आहे. गेल्या अनेक दिवसापासून रायगडचे पालकमंत्रीपद शिवसेनेचे तीन आमदार असल्याने भरत गोगावले यांना मिळणार अशी चर्चा रंगली होती. मात्र, अदिती तटकरे यांनाच ध्वजारोहण करण्याची संधी मिळाली आहे.

दरम्यान, गेल्या चार दिवसापूर्वी दिल्लीत उपमुख्यमंत्री एकनाथ शिंदे यांनी पीएम नरेंद्र मोदी, केंद्रीय गृहमंत्री अमित शाह यांची भेट घेतली होती. त्यावेळीच राष्ट्रवादी काँग्रेसचे प्रदेशाध्यक्ष सुनील तटकरे व एकनाथ शिंदे यांची बैठक झाली होती. मात्र, त्यानंतरही या वादावर तोडगा निघाला नाही.