Ajit Pawar : अजितदादांचा तानाजी सावंतांच्या मतदारसंघात मोठा धमाका; लढवय्या नेत्याची राष्ट्रवादीत एंट्री

Mumbai News : राज्यातील स्थानिक स्वराज्य संस्थांच्या निवडणुका तोंडावर आल्या असल्याने महायुतीमध्ये इनकमिंग जोरात सुरु आहे. महायुतीमध्ये महाविकास आघाडीतील उद्धव ठाकरेंची शिवसेना, काँग्रेस, शरद पवार यांच्या राष्ट्रवादी काँग्रेसमधून मोठ्या प्रमाणात प्रवेश होत आहेत. त्यातच धाराशिवमध्ये शरद पवार यांच्या पक्षाला मोठा धक्का बसला आहे. भूम-परंडा मतदारसंघातून आमदारकीची तीन टर्म पूर्ण केलेल्या माजी आमदार राहुल मोटे यांनी मंगळवारी मुंबईत उपमुख्यमंत्री अजित पवार यांच्या उपस्थित राष्ट्रवादी काँग्रेसमध्ये प्रवेश केला.

माजी आमदार राहुल मोटे यांच्या प्रवेशाने आता भूम-परंडा मतदारसंघातील चित्र पालटणार आहे. नुकत्याच झालेल्या विधानसभा निवडणुकीत महाविकास आघाडीकडून रिंगणात उतरलेल्या राहुल मोटे यांचा केवळ 1500 मताने पराभव स्वीकारावा लागला होता. मोटे यांचा तात्कालीन आरोग्यमंत्री तानाजी सावंत यांनी पराभव केला होता. त्यामुळे याठिकाणी आता येत्या काळात महायुतीचे वर्चस्व असणार आहे.

त्यामुळे आगामी काळात होत असलेल्या स्थानिक स्वराज्य संस्थेच्या निवडणुकीत या ठिकाणी महायुतीचे वर्चस्व पाहवयास मिळणार आहे. धाराशिव जिल्हा एकेकाळी शरद पवार (Sharad Pawar) यांचा बालेकिल्ला मानला जात होता. मात्र, या ठिकाणी आता राष्ट्रवादी काँग्रेसमध्ये फूट पडल्यापासून मोठ्या प्रमाणात गळती लागली आहे. नुकत्याच झालेल्या विधानसभा निवडणुकीत महाविकास आघाडीला पराभव स्वीकारावा लागला होता. त्यामुळे धक्क्यावर धक्के बसत आहेत.

भूम, परंडा, वाशी मतदारसंघाचे माजी आमदार राहुल मोटे हे राष्ट्रवादी काँग्रेसकडून (Ncp) 2004, 2009 व 2014 साली तीन टर्म निवडून आले होते. दरम्यान, प्रवेश करण्यापूर्वी मोटे यांनी भूम, परंडा आणि वाशी या तीन तालुक्यांमधील कार्यकर्त्यांची बैठक घेतली होती.

मुंबईत पार पडलेल्या प्रवेश सोहळ्यास मोठ्या संख्येने भूम-परंडा तालुक्यातील मोटे समर्थक नेत्यांनी अजित पवार यांच्या उपस्थित प्रवेश केला. मोटे यांच्या प्रवेशाने आगामी काळात होत असलेल्या स्थानिक स्वराज्य संस्थेच्या निवडणुकीत या ठिकाणचे चित्र बदलणार आहे.