Maharashtra Government : CM फडणवीसांचा त्यांच्याच मंत्र्यांवर भरोसा नाय? गोपनीयता राखण्यासाठी घेतला मोठा निर्णय

Maharashtra Government News : मंत्रिमंडळ बैठकांमधील गोपनीयता राखण्यासाठी राज्यात आता ई-कॅबिनेट प्रणाली लागू करण्यात येणार आहे. त्यासाठी प्रत्येक मंत्र्याला आयपॅड देण्यात येणार आहे. या आयपॅडसाठीच्या 1 कोटी 16 लाख रुपयांच्या खर्चाला सरकारने मंजुरीही दिली आहे. ई-कॅबिनेट संकल्पनेनुसार, मंत्र्यांना मंत्रिमंडळ बैठकांचे प्रस्ताव आयपॅडद्वारे पाहता येणार आहेत.

मंत्रिमंडळ बैठकांचे प्रस्ताव बैठकीपूर्वीच बाहेर येत असल्याचे निदर्शनास आले होते. त्यानंतर मुख्यमंत्री फडणवीस यांनी मंत्र्यांची कानउघडणी देखील केली होती. पण त्याचवेळी मुख्य सचिव सुजाता सौनिक यांना यावर उपाय करण्याबाबत सूचना देण्यात आल्या होत्या. त्यानुसार, राज्य मंत्रिमंडळाच्या 2 जानेवारी 2025 रोजी झालेल्या बैठकीत कागदविरहित मंत्रिमंडळ अर्थात ई-कॅबिनेटबाबत सादरीकरण केले होते.

यात मंत्र्यांना मंत्रिमंडळ बैठकांचे प्रस्ताव आयपॅडद्वारे पाहता येणार होते. त्यानंतर सामान्य प्रशासन विभागाने हा प्रस्ताव स्वीकारला असून त्यासाठी आयपॅड खरेदी खर्चाला मंजुरीही दिली आहे. त्यानुसार 50 आयपॅड खरेदी केले जाणार आहेत. तसेच मंत्र्यांना आयपॅड हाताळण्यासाठी आणि वापरण्यासाठी प्रशिक्षण दिले जाणार आहे. याच संकल्पनेला ई-कॅबिनेट असे नाव देण्यात आले आहे.

फडणवीसांचा त्यांच्याच मंत्र्यांवर भरोसा नाय का?

दरम्यान, मंत्रिमंडळ बैठकीतील प्रस्वात बैठकीपूर्वीच बाहेर जात असल्याचे निदर्शनास आल्याने फडणवीस यांनी मंत्र्यांची कानउघडणी केल्याचे सांगितले गेले होते. त्यानंतर देखील त्यांनी थेट आयपॅडचाच निर्णय घेतल्याने त्यांच्याच मंत्र्यांवर त्यांचा भरोसा नाय का? असा सवाल विचारल जातोय.