Chandrahar Patil : सांगलीत शिवसेनेला मिळणार आणखी एक आमदार? ठाकरेंच्या 'पैलवानाचा' शिंदेंच्या आखाड्यात होणार जंगी प्रवेश

Sangli News : अखेर डबल महाराष्ट्र केसरी चंद्रहार पाटील यांनी एकनाथ शिंदे यांचे नेतृत्व मान्य केले असून शिवसेनेत प्रवेश करण्याचा पक्का निर्णय झाला आहे. उद्या (9 जून) ठाण्यात उपमुख्यमंत्री एकनाथ शिंदे, मंत्री उदय सामंत, मंत्री संजय शिरसाट, मंत्री शंभूराज देसाई, मंत्री प्रकाश आबिटकर, मंत्री प्रताप सरनाईक यांच्या उपस्थितीत पाटील यांचा पक्षप्रवेश होणार आहे. यावेळी आपल्यासोबत 5 हजार कार्यकर्तेही असणार असल्याचे त्यांनी सांगितले आहे. पाटील यांच्या पक्षप्रवेशानंतर सांगलीमध्ये शिवसेनेची ताकद वाढणार असल्याचा दावा केला जात आहे.

गतवर्षी लोकसभा निवडणुकीपूर्वी चंद्रहार पाटील यांनी शिवसेना उद्धव बाळासाहेब ठाकरे पक्षात प्रवेश केला होता. त्यानंतर त्यांना सांगली मतदारसंघातून उमेदवारीही दिली होती. त्यांच्या उमेदवारीमुळे सांगली मतदारसंघाची राज्यभर चर्चा झाली होती. महाविकास आघाडीतही वितुष्ट निर्माण झाले होते. पण चंद्रहार पाटील यांचा पराभव झाला होता. काँग्रेसमधून बंडखोरी केलेल्या विशाल पाटील यांनी पाटील यांना चितपट केले होते.

तेव्हापासूनच चंद्रहार पाटील अज्ञातवासात गेले होते. पण गेल्या काही दिवसांपासून ते एकनाथ शिंदे यांच्या शिवसेनेतील काही नेत्यांच्या संपर्कात होते. ते शिंदेंनाही भेटले होते. यानंतरच त्यांच्या पक्ष प्रवेशाच्या चर्चा सुरू झाल्या होत्या. दरम्यान मंत्री संजय शिरसाट यांनी देखील उद्धव ठाकरे यांना खुले आव्हान देत चंद्रहार पाटलांचा प्रवेश रोखून दाखला असे म्हटले होते. तसेच त्यांनी त्यांच्या पक्ष प्रवेशाची तारीख देखील सांगितली होती.

मिळालेल्या माहितीनुसार, चंद्रहार पाटील यांनी पक्ष प्रवेशापूर्वी काही अटी आणि शर्तीही ठेवल्या होत्या. यात विधान परिषदेवर संधी देण्यात यावी आणि राष्ट्रीय क्रिडा संकुलाला निधी मिळावा, या दोन प्रमुख मागण्या करण्यात आल्या होत्या. आगामी स्थानक स्वराज्य संस्थांच्या निवडणुकीच्या पार्श्वभूमीवर मोठी जबाबदारीही दिली जावी अशी मागणी त्यांनी केली होती. या मागण्यांना सकारात्मक प्रतिसाद मिळाला असल्याचे सांगितले जाते.