Shivsena Rajya Sabha: शिंदेंकडून वाघमारेंना राज्यसभेची उमेदवारी जाहीर झाल्यानंतर शिवसेनेत वादाची पहिली ठिणगी; इच्छुक नेता भडकला; म्हणाले...

Mumbai News: महाराष्ट्रातील राज्यसभेच्या सात जागांसाठीचे चेहरे अखेर ठरले आहेत. राज्यसभेच्या उमेदवारीचा अर्ज भरण्यासाठी गुरुवारी (ता.5) अखेरचा दिवस होता. यादिवशी एकनाथ शिंदेंच्या शिवसेनेकडून कुणाला संधी मिळणार याबाबत मोठी उत्सुकता निर्माण झाली होती. कारण शिवसेनेच्या अनेक दिग्गज नेत्यांनी राज्यसभेच्या उमेदवारीसाठी देव पाण्यात ठेवले होते. पण आता शिंदेंच्या शिवसेनेकडन भाजपच्या पावलावर पाऊल टाकत धक्कातंत्राचा वापर करत ज्योती वाघमारे यांना संधी दिली आहे. यामुळे शिवसेनेतील गटबाजी चव्हाट्यावर आली आहे.

राज्याचे उपमुख्यमंत्री आणि शिवसेनेचे मुख्य नेते एकनाथ शिंदे यांच्या शिवसेनेकडून गुरुवारी (ता.05) शिवसेनेच्या प्रवक्त्या ज्योती वाघमारे यांना मोठी संधी देण्यात आली आहे. राहुल शेवाळे, गजानन कीर्तीकर, शायना एन्सी, संजय निरुपम, संजय मंडलिक, आनंदराव आडसूळ या सगळ्या दिग्गजांना धक्का देत ज्योती वाघमारे यांनी राज्यसभेची उमेदवारी मिळवली. पण वाघमारेंना राज्यसभेची उमेदवारी जाहीर होताच शिवसेनेतील ज्येष्ठ नेत्यानं नाराजीचा पहिला बॉम्ब फोडला आहे,.

शिवसेनेचै माजी खासदार शिवसेना नेते आनंदराव अडसूळ यांनी राज्यसभेची न मिळताच शिवसेनेसह भाजपवर जोरदार टिका केली आहे. ते म्हणाले, नाराजी ही मनात ठेवायची की बाहेर काढायची हा प्रश्न आहे. नाराजी ही सर्वांकडेच असते. ज्यावेळी एखादी गोष्ट अपेक्षित असताना ती मिळत नाही, त्यावेळी नाराजी ही असतेच असं विधान करत आपल्याला नाराजीला मोकळी वाट करुन दिली.

एकीकडे आनंदराव अडसूळ यांनी आपली खदखद बाहेर काढतानाच दुसरीकडे मी पक्षाचा जबाबदार नेता असून शिंदे यांच्या वाघमारेंना उमेदवारी देण्याच्या निर्णयावर अधिक काही बोलणार नाही असं स्पष्ट करतानाच भरपूर काही बोलून गेले. आडसूळ यांनी यावेळी ज्योती वाघमारे यांना उमेदवारी का दिली, याबद्दल आपण काही बोलणार नसून हा पक्ष नेतृत्वाचा निर्णय आहे असंही मत आडसूळ यांनी व्यक्त केलं.

माजी खासदार आनंदराव अडसूळ यांनी आपण राज्यसभेसाठी इच्छुक होतो हे सांगायला तेही विसरले नाही. त्यांनी शिवसेनेवर नाराजी व्यक्त करतानाच दुसरीकडे भाजप आणि अमित शाह यांच्यावरही टीकेची झोड उठवली आहे. भाजपनं एकनाथ शिंदेंसमोर दिलेला शब्द पाळला नसल्याचं सांगत ही येनकेनप्रकारे फसवणूकच असल्याचा गंभीर आरोपही त्यांनी केला आहे.

भाजपने आपल्याला लोकसभा निवडणुकीवेळी राज्यपालपदाचा शब्द दिला होता. हा शब्द अमित शाह यांनी दिला होता. त्यांनी तसे लेखी आश्वासनही दिले होते. पण तो शब्द भाजपकडून पाळला गेला नाही. तसेच भाजपने राज्यपालपद नाही तरकिमान त्यांच्या कोट्यातून राज्यसभेची उमेदवारी ही द्यायला पाहिजे होती अशी रोखठोक भावनाही आनंदराव अडसूळ यांनी बोलून दाखवली.

शिवसेनेचे ज्येष्ठ नेते आनंदराव अडसूळ यांनी यावेळी आपल्याला जे आश्वासन दिले होते त्याबाबत एकनाथ शिंदे यांना आपण वारंवार बोललो होतो. ते या सर्व गोष्टींचे साक्षीदार असल्याचा दावा केला आहे. अमित शाह यांनी स्वत: लेखी आश्वासन दिले होते. तरीही त्याचे पालन होत नसेल तर काय बोलणार असा तीव्र नाराजीचा सूर अडसूळ यांनी आळवला.