Shivsena Candidate List : शिवसेनेच्या पहिल्या यादीत घराणेशाही, सख्ये भाऊ, खासदाराची पत्नी, आमदार पुत्र निवडणुकीच्या रिंगणात

Shivsena Candidate List : मुख्यमंत्री एकनाथ शिंदे यांच्याकडून शिवसेनेची पहिली उमेदवार यादी जाहीर करण्यात आली आहे. पहिल्या यादीत 45 उमेदवांराचा समावेश आहे. भाजपने देखील आपली 99 उमेदवारी यादी घोषित केली होती. त्यामध्ये 20 उमेदवार हे राजकीय घराणेशाहीतील होते. तसेच एकनाथ शिंदे यांच्या उमेदवार यादीमध्ये राजकीय घराण्यांमधील नात्यागोत्यात उमेदवारी दिल्याचे दिसते.

कोकणातील रत्नागिरी मतदारसंघातून उदय सामंत हे उमेदवार आहेत. तर, त्यांचे सख्ये भाऊ किरण सामंत यांना राजापूर मतदारसंघातून उमेदवारी देण्यात आली आहे.

लोकसभा निवडणुकीत छत्रपती संभाजीनगरमधून विजयी झालेले संदीपान भुमरे यांच्या पैठण विधानसभा मतदारसंघातून त्यांचे पुत्र विलास भुमरे यांना उमेदवारी घोषित झाली आहे. तर, लोकसभेला मुंबई उत्तर पश्चिम मतदारसंघातून विजयी झालेले रवींद्र वायकर यांच्या पत्नी मनीषा वायकर यांना उमेदवारी देण्यात आली आहे.

लोकसभा निवडणुकीत अमरावतीमध्ये नवनीत राणा यांच्या विरोधात भूमिका घेणार शिवसेनेचे ज्येष्ठ नेते, माजी खासदार अरुण अडसूळ यांचे पुत्र अभिजित अडसूळ यांना दर्यापूरमध्ये मतदारसंघातून उमेदवारी देण्यात आली आहे.

दिवंगत आमदार अनिल बाबर यांचे पुत्र सुहास बाबर यांना खानापूर मतदारसंघातून तिकीट देण्यात आले आहे.जळगावमधील एरंडोल मतदारसंघातून आमदार चिमणराव पाटील यांचे पुत्र अमोल पाटील यांना उमेदवारी देण्यात आली आहे.

चोपडा मतदारसंघातून आमदार लताबाई चंद्रकांत सोनवणे यांचे पती चंद्रकांत सोनवणे यांना उमेदवारी जाहीर करण्यात आली आहे.

तीन महिलांना उमेदवारी

एकनाथ शिंदे यांनी शिवसेनेच्या फूटीवेळी त्यांना साथ देणाऱ्या सर्वच आमदारांना पुन्हा तिकीट दिल्याचे दिसते आहे. तर, तीन महिला उमेदवारांना शिंदेंनी उमेदवारी दिली आहे. त्यामध्ये साक्री मतदारसंघातून मंजुळाताई गावीत, जोगेश्वरी मतदारसंघातून मनीषा वायकर, भायखळा मतदारसंघातून यामिनी जाधव यांना उमेदवारी जाहीर झाली आहे.